100 لیتر بەش زمسان نیەکەێد.. ناڕەزایی لە ناوچە کویەسانەیل دهۆک لە بەشە "نەفت چەرمگ"
شەفەق نیوز- دهۆک
هاوڵاتیەیل لە قەزای ئامێدی لە پارێزگای دهۆک، ئمڕوو شەممە، ناڕەزایی خوەیان نیشاندان لە کەمی بڕ نەفت چەرمگ تەرخانکریاگ ئەرا خێزانەیل وە مەبەست گەرمەوکردن، و دووپات کردن بەشە 100 لیترییەگە بەش رویوەرویبوین زوقوم سەخت نیەکەێد کە ناوچە کویەسانەیل وەخوەیان دوینن، لە سای کەمی چوو و کەمی دابینکردن کارەبا.
پرۆسەی بەشەوکردن نەفت چەرمگ لە ئاواییەیل ناوچە کویەسانەیل، وەتایبەت لە قەزای ئامێدی و ناحیەی بێگۆڤا، وەرجە سێ رووژ دەسوەپێ کرد، وە بڕ 100 لیتر ئەرا هەر خێزانیگ وەرانوەر 30 هەزار دینار، وەگورەی وەڕێوەبەر فەرمانگەی نەفت و کانزایل لە پارێزگای دهۆک، کارزان رەئوف.
رەئوف ئەرا ئاژانس شەفەق نیوز وت، حکومەت فیدراڵی بڕە نەفت تەرخانکریاگ ئەرا بەشەوکردن لەبان هاوڵاتیەیل لەو ناوچەیلە کلکردگە، و دووپات کرد لە وەردەوامی پرۆسەگە وەپای پلان دیاریکریاگ.
لە وەرانوەر ئەوەگ، شمارەیگ لە هاوڵاتیەیل بڕ تەرخانکریاگ ئەرا خێزانەیل وە نەگونجاو و بێبەش وەسف کردن ئەرا دابینکردن هەوەجەیل گەرمەوکردن لە ماوەی وەرز زمسان، لە سای داوەزیان پلەیل گەرمی و بارودۆخ کەشوهەوای سەخت کە ناوچە کویەسانەیل وەخوەیان دوینن.
هاوڵاتی بەرفان محەمەد ئەرا ئاژانس شەفەق نیوز ئاشکراکرد، بڕ بەشەوکریاگ فرە کەمە و هەوەجەیل خێزانەیل لە ناوچەیگ کە زمسانیگ سەخت وەخوەی دۊینێد دابین نیەکەێد، و ئاشکراکرد دانیشتگەیل ئامێر گەرمەوکردن پوڕیاگ نەیرن، وەرد نەبوین چوو لای فرەیگ لە خێزانەیل، کە ئەوەیش ئازارەیلیان زیاتر کەێد.
لە لای خوەیەو، هاوڵاتی بەشار یاسین وت 100 لیتر نەفت چەرمگ تەنانەت بەش دوو رووژیش نیەکەێد لەو کەشوهەوا سەردە کە ئامێدی وەخوەی دوینێد، و پرسیار کرد خێزان توەنێد چە وەی بڕە بکەێد لە سای نەبوین ئامێر گەرمەوکردن پوڕیاگ و چوو و کارەبا.
یاسین دیاری کرد، نرخ بەرمیلیگ نەفت چەرمگ بازرگانی لە ناوەین 380 و 400 هەزار دینارە، سەنین بڕەیل زیادە کەێدە کاریگ سەخت ئەرا خێزانەیل کەم دەرامەت، و بارگرانی دارایییان دوو ئەوەنە کەێد لە سای هەوەجیان وە دابینکردن هوەەی گەرمەوکردن.
دیاری کرد، بەشیگ لە خێزانەیل لە ماوەی وەرز زمسان هەوەجە وە پەنج یا شەش بەرمیل نەفت چەرمگ هەس ئەرا رویوەرویبوین سەرما، وەگەرد ئەوەیش هاتێ ئی بڕەیلە بەش نەکەن وە مدوو بارودۆخ کەشوهەوای سەخت ناوچەگە وەخوەی دۊینێد، و داوا لە حکومەت کرد دەسمیەتی هاوڵاتیەیل بدەێد و بەشە تەرخانکریاگەیل ئەرا ناوچە کویەسانەیل زیای بکەێد.