هەرێم کوردستان نواگیری ئاڵشبوین کەشوهەوا وە چنین یەک مەلیۆن دار لە ساڵیگ کەێد
شەفەق نیوز/ بێگەرد تاڵەبانی خانمە وەزیر کشتوکاڵی و سامانەیل ئاوی لە هەرێم کوردستان، ئمڕوو سێشەممە، دەسکردن وە هەڵمەت دارچنین و زیایکردن رووبەرە سەوزەێل لەگشت ناوچە و شارەیل هەرێم کوردستان راگەیان.
تاڵەبانی لە کۆنگرەیگ رووژنامەوانی لە هەولێر وت: ئیمە لە هەرێم کوردستان نواگیری ئاڵشبوین کەشوهەوا کەیمن ک ناوچەگە و جەهان گرێدەو، و لە هەس وە پرسیارەتی، و وەخاتر زیایکردن ریژەی ڕووبەرە سەوزەیل دەس وەی هەڵمەتە کردیمن.
وتیش: وەزارەت کشتوکاڵی ئمساڵ بڕیار دا نەمام وەپەتی بەێدە کشاورزەیل و فەرمانگەیل فەرمی وەخاتر سەرکەفتن پلان زیایکردن شمارەی دارەیل و رووبەرە سەوزەێل لە هەرێم کوردستان.
وتیش: ئەگەر توەنستیمن نزیکەی یەک مەلیۆن نەمام لە ساڵیگ لە هەرێم کوردستان بچنیمن، خو وەماوەی ساڵەیل بانان کارگەری گەورەیگ لە نواگیری ئاڵشبوین کەشوهەوا دروس کەیمن.
عراق کەفێدە پلەی پەنج لەناو زەرەدمەنترین دەوڵەتەیل لە ئاڵشتبوین کەشوهەوا لە ئاست جەهان.
