نێچیرڤان بارزانی: فەڕەنسا ئامادەس ئەرا وەردەوامی پشتگیریکردن ئارامی سیاسی و ئابووری عراق
شەفەق نیوز/ نێچیرڤان بارزانی سەرۆک هەرێم کوردستان، ئمڕوو چوارشەممە، دووپات کرد ک ئیمانوێل ماکڕۆن سەرۆک فەڕەنسا ئامادەبوون وڵاتەگەی ئەرا وەردەوامی لە پشتگیریکردن ئارامی سیاسی و ئابووری لە عراق نشان دا.
بارزانی لە کۆنگرەیگ رۆژنامەوانی لە پاریس لە مەوقەی سەردانە فەرمیەگەی ئەرا فەڕەنسا وت: لە کۆبونەوەگەی دوێەکە وەگەرد سەرۆک ماکڕۆن دووپات لەبان گرنگی پشتگیریکردن عراق و هەرێم کوردستان و سەروەریی کریا، و پێروزبایی لە عراق و هەرێم کرد ئەرا سەرکەفتن سەردانەگەی پاپای ڤاتیکان.
وتیش؛ سەرۆک فەڕەنسا دووپات کرد ک ئەوەسا گشت تەقەلایلیگ ئەرا ئارامی عراق کەێد، و وەردەوامی لە پشتگیریکردن سیاسی و ئابووری، و فەڕەنسا ئامادەس ئەرا پشتگیریکردن عراق لە چوارچیوەی هاوپەیمان ناودەوڵەتی لە جەنگ دژوە تیرۆر.
هەمیش وت: پەیوەندیەگە وەگەرد دەوڵەتەیل هاوسا وەتایبەت سوریا هەمیش باوەتیگ لە باسەکان وەگەرد سەرۆک ماکڕۆن بوی.
بارزانی دەسخوەشی لە ئەو دەورە کرد ک سەرۆک فەڕەنسا لە سووکەوکردن کاریگەریەکان رانیەی ک لە پشت ریفراندۆم سەروەخوەییەگە بوی ک هەرێم کوردستان ئەنجامی دا، ک لە هەرێم کوردستان و عراق لە ساڵ ٢٠١٧ بوی و بەڕێز ماکڕۆن دەوریگ سەرەکی لە چارەسەرکەردن گرفتەیل داشت، و ئەگەر ئەو دەوریە نەوێاتاد وەنە کارەگە ئاڵووزترەو بوی، وەتایبەت ناکۆکیەکان لەناوبەین بەغداد و هەولێر.
هەمیش سەرۆک هەرێم جەخت کرد ک ئارامی عراق ئەرا ناوچەگە و دەوڵەتە ئۆڕوپاییەکان گرنگە، و مکیسکردنمان ئەرا فەڕەنسا لەی بنەما ئەرا باسکردن ئی باوەتەیلە هات، و ئەوەسا دانووستانەیلمان وەردەوام بوود تا بڕەسیمنە قۆناغ ئارامی لە عراق و ناوچەگە.
وتیش؛ رەسینەوە دیرێد ک بەڕێز ماکڕۆن بوودە خاوەن دەور گرنگیگ لە هاتنەوەی ئاسایش و ئارامی لە عراق، و ئاماژە کرد ک دویای هاتنەوەی ئەرا هەرێم ئەوەسا باس لە باوەت ئارامی عراق وەگەرد هێزە سیاسیە کوردستانی و عراقیەکان کەێد.
بارزانی وتیش: فەڕەنسا خاوەن پەیوەندیەل ئابووری خاسیگە، و بی گومان تەقەلای گەشەپێدان ئی پەیوەندیەیلە لە گشت چینەیل ئەرا دویارووژ دەێد.
بارزانی هەمیش وت: لە کۆبونەوەی دوێەکە زیاتر جەخت لەبان پەیوەندیەگەی ناوبەین هەرێم و فەڕەنسا کردیمن، و بەڕێز ماکڕۆن خوازێد بزانێد عراق چە خوازێد ئەرا هاوردنەوەی ئارامی سیاسی و ئەمنی لەناوی، و هەمیش وەشیوەی فرەیگ باس پەیوەندیەگە وەگەرد دەوڵەتە هاوساکان کردیمن.
