نێچیرڤان بارزانی دووپات لە پاڵپشتی تەواوی ئەرا هەر پلانیگ کەێد کە ئامانجی چارەسەرکردن کیشەیل ئێزدییەیلە لە شەنگال
شەفەق نیوز - دهۆک
نێچیرڤان بارزانی، سەرۆک هەرێم کوردستان، ئمڕوو یەکشەممە، بانگەواز ئەرا فراوانکردن بەرنامەیل خاسەوکردن دەروينی ئەرا قوربانییەیل ریخریاگ داعش و کووچپیکردن زوورەملێ کرد، وە دووپاتکردن لە خود وەخت لەبان پاڵپشتی تەواوی ئەرا هەر کار یا پلانیگ کە ئامانجی چارەسەرکردن کیشەیل ئێزدییەیل لە قەزای شەنگال و هەر ناوچەیگ ترەک لە ناوچەیلیان بوود لەناوی خوازینەیل و بەرژەوەندییەیلیا.
یەیش لە وتاریگ هات کە وە نۊنەرایەتی لەلایەن دڵشاد شەهابەو، قسەکەر وەناو سەرۆکایەتی هەرێم کوردستان، پيشکەش کریا لە ناو ریورەسمەیل زینگەوکردن یاد دەهەمین ساڵەی دامەزرانن "پەیمانگای خاسەوکردن دەروينی (ترۆما)" لە زانکۆی دهۆک.
سەرۆک نێچیرڤان بارزانی وت کە "دامەزرانن ئی پەیمانگا گامیگ گرنگ بۊ لە دەسمیەتیداین و کەمەوکردن زیانەیل و دەردەیل دەروینی ئەرا ئەو کەسەیلە کە لە شوینەوارەیل جەنگ و تیرۆر و تونوتیژی ناڵن"، وە ئاشکراکردن ئومیدی لە "زیایبۊن جۊر ئی نموونەیلە و فراوانکردن ئەزموونەیلیان".
دیاری کرد کە "گەل کوردستانی و عراقی ساڵەیل دریژیگ لە جەنگەیل رەد کردن، کە بڕیگ لە هاووڵاتییەیل کەسەیل و ماڵ و سامانەیلیان لەدەس دان، و بڕیگ ترەک ناچار بۊن ناوچەیلیان وەجی بیلن و لە ناوچەیل دۊر و پەراویزخریاگ بژیەن".
دووپات کرد کە "کوشتارگشتی کە ریخریاگ داعش وەرانوەر ئێزدییەیل کردیەسەی لە گەورەترین کارەساتەیلە کە رۊ دانە، و لیکەفتەیل ئی کارەساتە کاریگەرییگ فرە گەورەیگ لەبان ماڵ و گیانیان داشت"، وە دەسنشانکردن ئەرا ئەوە کە "بڕیگ لە زەخمەیل شوینەوارەیلیان لەناو گیان ئایەم مینێد و هەوەجە وە ماوەیگ دریژ کەێد تا خاسەو بوون، و ئیمە خستیمەسە بان شان خوەمان کە ئەو کەسەیلە کە تویش ئی کارەساتەیلە هاتنە وە تەنیا نەیلیمن، و بایەسە دەسمیەتییان بیەیمن تا وەردەوام بوون لە ژیان وەرەو سوویگ خاستر و گەشبینتر".
سەرۆک هەرێم کوردستان دەسنشان ئەرا ئەوە کرد کە "خزمەتگوزارییەیل دووارە خاسەوکردن دەروینی کە پەیمانگاگە لە دهۆک و شەنگال پیشکەشی کەێد جی رێز و پیزانینە، کە کاری تەنیا لەبان پیشکەشکردن دەسمیەتی ئەرا دواییهاوردن وە دەرد زیانلیکەفتگەیل نییە، بەڵکم دریژەو بوود ئەرا ئامادەکردن کادرەیل پسپۆڕ کە وەردەوام بوون لە پیشکەشکردن ئی خزمەتگوزارییەیلە لە بانان".
بارزانی سوپاس خوەی ئەرا حکومەت ئەڵمانی ئاشکرا کرد ئەرا ئەو دەسمیەتییەیلە کە پیشکەش وە هەرێم کوردستان کردیە، و وە تایبەت ئەرا رفیاگەیل ئێزدی کە لە دەس ریخریاگ داعش رزگار کریانە.
لە کۆتایی وتارەگەی دووپات کرد لەبان "هەوەجیی وەردەوامبۊن پیشکەشکردن دەسمیەتی حکومی و ناودەوڵەتی ئەرا ئەو کەسەیلە کە لە تاوانەیل داعش و ئەوەگ لە جەنگەیل و تونوتیژی هاتە دی ناڵن، و فراوانکردن خزمەتگوزارییەیل دووارە خاسەوکردن دەروینی ئەرایان، وە تایبەت ئەرا ئەوانەگ لە دەردەیل تیرۆر و کووچپیکردن ناڵن تا خاسەوبۊنیان گلەو بخوەن و ئی قۆناغە سەختەیلە وەپشت سەر بنەن"، وە دووپاتکردن "پاڵپشتی تەواو ئەرا وەدەسهاوردن گشت مافەیل ئێزدییەیل، و پاڵپشتیکردن هەر پلانەیلیگ کە بوودە مسۆگەرکەر چارەسەرکردن کیشەیلیان لە شەنگال و گشت ناوچەیلیان لەناوی خوازینەیل و بەرژەوەندییەیلیان".
