نێچیروان بارزانی وەگەرد باڵیۆز فەرنسا باس تەقەلایل لەناوبردن داعش کەن
شەفەق نیوز/ نێچیروان بارزانی سەرۆک هەرێم کوردستان، وەگەرد ئێریک شوفالێە باڵیۆز فەرنسا لە عراق، ئمڕوو پەنجشەممە، دووپات لە گردەوکردن تەقەلایل عراق و کۆمەڵگای ناودەوڵەتی کردن ئەرا لەناوبردن داعش و نەهیشتن گلەوخواردنی، و هەمیش باس رەوشەیل ئەیزیدیەیلە و شیوەی گلەوداینیان ورەو میلکانیان کردن.
سەرۆکایەتی هەرێم کوردستان لە بەیاننامیگ رەسیە ئاژانس شەفەق نیوز وت: سەرۆک بارزانی لەمەوقەی پیشوازیکرنی لە شوفالێە دووپات لە ئارەزوو هەرێم کوردستان لە چارەسەرکردن گرفتەیلی وەگەرد حکومەت عراق لەڕی دانوسەنین و لەبنەمای دەستوور کرد.
بەیاننامەگە وتیش: هەردوگ لایەنەگە باس باوەت پەیوەندیەیل فەرنسا وەگەرد عراق و هه‌رێم کوردستان، و دەرفەتەیل بتەوکردن هاوکاری هاوبەش ناوبەینیان کردن، و بارزانی دووارە دەسخوەشی هەرێم کوردستان لە رووڵ فەرنسا و گرنگیدانی وە عراق و هەرێم کوردستان ئاشکرا کرد، تایبەت لە چوارچێوەی هاوپەیمان ناودەڵەتی ئەرا لەناوبردن داعش.
هەردوگ لایەنەگە باس مەترسیەیل داعش و زیایبۊن پەلامارەیل تیرۆرانەی کردن چ لە عراق یا لە سوریایش، ک جۊر هەڕەشەی راسییگە لەبان ئاسایش و ئارامی، و دووپات لە گرنگی هەماهەنگی و هاوکاری ناوبەین هەولێر و بەغداد و پاڵپشتیکردن کۆمەڵگای ناودەوڵەتی ئەرا ریبڕین لە گلەوخواردن داعش کردن.
هەمیش باس لە رەوش ئەیزیدیەیلە و ئەو ریگریە ک کەفێدە نوای ئاوەدانکردن شەنگال کردن، و قەیرانەیل سیاسی لە عراق لە دۊای هەڵبژاردنەگە، و هەمیش باس بڕیارەیل دادگای فیدراڵی باڵای عراق لەباوەت نەفت وگاز لە هەرێم کوردستان، وەگەرد رەوشەیل ناوخۆیی و گرنگی یەکڕزی هەڵوێست لایەنەیل کوردستانی لە بەغداد، وەگودس باسکردن لە رەوشەیل سوریا و دۊاترین نووبۊەیل لە ئۆکرانیا.
