نێچیروان بارزانی دووپات لە گرنگی وەیەکڕەسینەوە و رێکەفتن کەێد ئەرا وەپشتسەرنان سەختیەیل سیاسی لە عراق
شەفەق نیوز/ نێچیروان بارزانی سەرۆک هەرێم کوردستان، شەوەکی ئمڕو چوارشەممە، پیشوازی لە مارشاڵ سامی سامبسۆن راویژکار سەربازی باڵای بەریتانیا ئەرا کاروبارەیل خوەرهەڵات ناوڕاس و باکوور ئەفریقا و شاند یاوەری کرد.
سەرۆکایەتی هەرێم کوردستان لە بەیاننامەیگ وت: لە گردەوبوینیگ وەزیر پێشمەرگە لە حکومەت هەرێم کوردستان ئامادەی بوی، باس پەیوەندیەیل بەریتانیا وەرد عراق و هەرێم کوردستان کریا، و دویاترین نووەبویەیل رەوش سیاسی لە عراق، مەترسیەیل تیرۆر وجویلەیل داعش، کار چاکسازی لە وەزارەت پێشمەرگە، پەیوەندیەیل هەولێر و بەغداد.
سەرۆک نێچیروان بارزانی سوپاس هەرێم کوردستان رەسانە بەریتانیا ئەرا ئەو دەسمیەتی و پاڵپشتیە ک لە جەنگ دژوە داعش ئەرا عراق و هەرێم کوردستان پیشکەشیان کرد، هەمیش دووپات لە گرنگی وەردەوامی پاڵپشتیکردن بەریتانیا و برادەرەیل لە کۆمەڵگای ناودەوڵەتی کرد ئەرا نواگردن مەترسیەیل تیرۆر و سەرکەفتن کار چاکسازی و دووارە رێکخستن پێشمەرگە.
هەردوگ لایەنەگە هاوڕا بوین لە گرنگی وەیەکڕەسینەوە لایەنەیل سیاسی ورێککەفتنیان، ئەرا پشتسەرنان ئەو سەختیەیلە لەنوای کار سیاسی لە عراق، و مقەیەتیکردن ئاسایش و ئارامی سیاسی لەی وڵاتە، و زوور لەبان گرنگی یەکڕزی لایەنەیل سیاسی لە هەرێم کوردستان کردن.
رەوشەیل ناوخوەیی هەرێم کوردستان، پەیوەندیەیل عراق و هەرێم کوردستان و دەوڵەتەیل هاوسا، گەشەیل ناوچەگە وەشیوەی گشتی، وبڕیگ لەو باوەتەیلە ک گرنگییان هاوبەشە، باس و باوەتەیل ئەو گردەوبوینە بوین ک قونسڵ گشتی بەریتانیا لە هەولێر ئامادەی بوی.
