نێچیروان بارزانی یاد سەرەتای تاوان کیمیاوارانکردن لەبان گەل و خاک کوردستان کەێد
نێچیروان بارزانی، سەرۆک هەرێم کوردستان لە بەیاننامەیگ راگەیان؛ “کیمیاوارانکردن ئی هەرێمە کە هەمیشە کۆڵانەی شووڕش و ماڵ خەبات دژ وە نادادپەروەری و دیکتاتۆری بویە، و ئەرا ئازادی قوربانیی گەورەی داگە ئەرا گەل لە کوردستان، سەرەتا و دەسکردن وە تاوان کیمیاواران خەڵک و خاک کوردستان بوی، کە بویەسە لاپەڕەیگ سیا "لە میژوو تاوانبارەیلی، لە خود وەختیش بویەسە هیمای ئەو ستەم و چەوساننە لە خەڵک کوردستان".
بارزانی وتیش: بوومباران کیمیاوی و ژەهراوی کردن خاک و ئاو و ئاسمان بالیسان و شێخ وسانان و دووڵ خۆشناوەتی ئیرادەی گەلە نیشتمانپەروە وەشەرەفەگە لاواز نەکرد، سەرلەنوو هەڵسیا و درویژە وە خەبات دژ وە نادادپەروەری و دیکتاتۆری دا ئەراوە شایستەی خاسترین خزمەتگوزاری و گرنگی زیاترن”.
نێچیروان بارزانی لە کۆتایی قسەیلی وتیش: سڵاو ئەرا گشت ئەو دڵسووزەیلە کە لە وەخت کیمیاوارانەگە هاتوین ئەرا دەسمیەتیدان قوربانیەیل، ژیان خوەیان خستنە مەترسی ئەرا بیناکردن و چارەسەرکردن زەخمدارەیل، گیان بەختەوەر شەهیدەیل شاد بوود، یادگارییان ئەرا هەمیشە بەرەکەتدار بوود.
وەرجە سی و هەفت ساڵ، رژیم بەعس ناوچەیل دووڵ بالیسان و ئاوایەیل شێخ وسانان (دووڵ خوشناواتی) بووردومان کرد، وە چەک کیمیایی قەیەغەکریای ناودەوڵەتی، وە مدووی 263 کەس کوشیان و زیاتر لە 620 کەسییچ زەخمدار بوین.
گورزەیل فڕۆکەیل رژیم وەرین لەبان ناوچەیل بالیسان و ئاوایەیل شێخ وسانان، وە گاز خەردەل و گاز سیانید، یەکەمجار بوی لەیجورەر ئیجا دویای ئەوە پەلامارەیل گاز لە شار هەڵەبجە و شارەیل ترەک لە هەرێم کوردستان دووارە کریا.
