کۆمیسیۆن: لەهەرێم کوردستان نزیکەی 160 سکاڵا توومارکریاس وەرد پویچەوکردن 208 هەزار دەنگ
شەفەق نیوز/ سەرۆک کۆمیسیۆن هەڵوژاردنەیل هەرێم کوردستان لە کۆمیسیۆن باڵای سەروەخوەی هەڵوژاردنەیل نەبەرد عومەر، ئمڕوو پەنجشەممە، راگەیان نزیکەی 160 سکاڵا توومارکریاس وەرگەرد پویچەوکردن نزیکەی 200 هەزار دەنگ لە هەڵوژاردنەیل هەرێم کوردستان خول شەشەمی کە لە هەرێم کوردستان وەڕیوەچی.
یەیش لە کونگرەیگ رووژنامەیی هاوبەش هاتیە کە لەناوەین قسەکەر کۆمیسیۆن ئەیسەر یاسین و وەلید خالید وەڕێوەبەر فەرمانگەی ئۆپراسیۆنەیل و تەکنەلۆجیای زانیاری و ئەندامیگ ئیداری هەڵوژاردنەیل لە پەرلەمان کوردستان ئەنجامدریا.
عومەر لە کۆنگرەیگ کە پەیامنێر ئاژانس شەفەق نیوز ئامادەبوی راگەیان، کۆمیسیۆن تا ئیسە 160 سکاڵا رەسیەس وەپی وەیش ئێ هەڵوژاردنە لە هەرێم کوردستان وەڕێوەچی وەشیوەی خاسیگ سەرکەفتی بوی.
وتیش؛ 6318 وێستگەی دەنگداین لەماووەی هەڵوژاردن لە هەرێم وازکریاس، هویچ گیچەڵیگ نەویە بیجگە لە 26 وێستگە لە هەولێر و سلێمانی و دهۆک، دوپاتکرد پرۆسەگە وە شیوە فرەخاسیگ وەڕیوەچی.
وتیش: هەلی هەڵوژاردنە رێژەی بەشداریکردن بەرزەوکردیە بەراورد وە هەڵوژاردن ساڵ 2021 کە لە هەرێم وەڕیوەچی، دیاریکرد شمارەی ئەو دەنگەیلە لە ساڵ 2021 پویچەوکریاس 197 هەزار دەنگ بویە و لە ئێ هەڵوژاردنە 208 هەزار دەنگ بوی.
لە لایگیش قسەکەر کۆمیسیۆن باڵا ئەیسەر یاسین لە کۆنگرەگە وت، کۆمیسیۆن تا ئیسە هویچ سکاڵای سووڕیگ لە هەڵوژاردن پەرلەمان کوردستان ساڵ 2024 توومارناکردیە.
