یەکەم بازاڕ ژنانە لە سلێمانی ئەرا پشتگیریکردن ژن کورد.. وێنە
شەفەق نیوز/ بڕیگ لە ژنەیل سلێمانی، ئمڕوو پەنجشەممە، بازاڕیگ تایبەت وە کارە دەسڕەنگینەگانیان وە ئامانج پشتگیریکردن ژن کورد واز کردن، لە یەکەم گامیگ وەیجوورە لە شارەگە.
پەیامنێر ئاژانس شەفەق نیوز لە سلێمانی وت: هۆڵ پێشەنگای نیشتمانی لە شارەگە، ئمڕوو وازکردن بازاڕیگ ئەرا کارە دەسڕەنگینەگان لە دیکۆر ت ئیکسیسواڕ و دڵنگ و تابلۆ و خوەراک و شیرینی و کارەیل جوانکاری و بەرهەمەیلیگ تر وەخوەی دی، و دیاری کرد ک ئی بازاڕە خوازێد پشتگیری ژن بکەێد، تا پشت وەخوەی بووەسێد و وزەیلی ئەرا دیارکەفتنی لەناو کۆمەڵگاگە درارێد.
لارا فەخرەدین خاوەن پڕۆژەی بازاڕەگە، ئەرا ئاژانس شەفەق نیوز ئووشێد؛ بازاڕەگە وەناو (ئێڵ سی) نریاگە، و ئاماژە کەێد ک ئەیە یەکەم جارە ئیجوور بازاڕیگ ئەرا بەرهەمەیل ژنەگان و پشتگیریکردنیان واز بکریەێد، و پویلەیل شیوەییگ دەن، ئەرا بەشداریکردن و سوودگردن لە فرووشتن چشتەیلیان، وە پشتبەسانن ژن وەخوەی و دیارخستن کەسایەتیەگەی، و ناسین وە جهان بازاڕەیل، و هەمیش پێشکەشکردن دەسمیەتی ئەرا خیزانەگەی.
و ئاماژە کرد ک فرەی ژنەگ بەشدارەگان، بەشداربوینیان نووە لەی کارە، و خوەی جوور دەرفەتیگە ئەرا سەێدرکەفتنیان، و دیاری کرد ک ژن کورد خاوەن کەسایەتی وەهێزیگە، و پشت وەخوەی لە ژیانی بەسێد، و خوەی وەگەرد کارەگەی لەماڵیش وەرپرسە، چوونکە خوەشی لە ژیان تیەێد.
١٨ ژن لە جووراجور پیشەگان لەی بازاڕە بەشدار بوین، ک ئەرا ماوەی دوو رووژ وەردەوام بوود.
