ماڵیگ وە ملیۆن ناونشان کتاو لە سلێمانی.. عەباس و گەنجینە گرانەگە.. وینە
عەباس لەی دویاییە ماڵیگ تایبەت ئەرا کتاوەیل وەکرا گردیە، لەوەر خوەشهاتنی لە کتاو، تا بویە خاوەن زیاتر لە یەک ملیۆن کتاو لە بوارە جیاجیایل، وەگورەی قسەیلی ئەرا ئاژانس شەفەق نیوز کرد.
خوەشهاتن و دووسیی ئەرا خوەنستن کتاو و روومان کوردی و عەرەبی و تەنانەت بیانییەیل هیشت زیاتر لە ٣٣ ساڵ کتاو بسینێد و بفرووشێد، کە ئیسە کتاوخانەیگ کتاو ئەدەب و فەلسەفە و کۆمەڵناسی و گشت زانستە مرۆییەیل و زانستە جیاجیایل وە جویراجویر زوانەیل هاناوی، ببجگە لە بڕ فرەیگ لە چاپەیلیگ گۆڤار عەرەبی و کوردی و بیانی.
عەباس دووسیی ئەرا کناو لە باوگیەوە بردیە هەناێ روومان و چیرووک داستانی ئەرا خوەی و برایلی هاوردیاد، و هەرچەن وە زوان داڵگی وە کوردی قسە کەێد، بەڵام وە خوەشەویستی و دووسی کتاو هوکارەی زوان عەرەبی بویە و دووس ناونیشان کتاوەیل عەرەبی داشتیە.
لەوەر ڕاپەڕین گەل کورد لە ساڵ ١٩٩١، عەباس نەتوەنست خوەنستن زانکۆیی لە زانکۆی موستەنسرییە لە بەش کتاوخانە لە بەغدا تەواو بکەێد، و لەو مەوقەیش رەسوێدە قۆناغ سێیەم، یەیش ناچاری کرد ئەرا زانکۆ لە سلێمانی لە ساڵ ١٩٩٣ گلەو بخوەێد، تا خوەنستن وە زوان کوردی تەواو بکەێد، بەڵام یەیش نواگیری نەکرد کە لە پیشەی خوەی واز بارێد کە هەر لە مناڵییەو دووسی داشتیە.
عەباس کتاوخانەگەی وە "گەنجینەی نرخدار" زانێد کە لە خوەشەویستیی ئەرا خوەنستن نیەتوەنێد واز لەلی بارێد، لە خود وەختەگە داوا لە گەنجەیل کەێد وەردەوام بوون لە خوەنستن ئەرا یایگردن و زانیاری.
