سەرۆک کوردستان دەسخوەشی لە ئەڵمانیا کەێد ئەرا پاڵپشتیکردن سەربازی و مرۆیی وە عراق و هەرێم کوردستان
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت، نێچیروان بارزانی سەرۆک هەرێم کوردستان، وەرجە نیمەڕو ئمڕوور، لە چوارچیوەی خشتەی کارەیلی لە کۆنگرەی میونخ ئەرا ئاسایش، وەگەرد شاندیگ لە پەرلەمان ئەڵمانیا گردەو بوی، و دیاری کرد ک گردەوبیونەگە وەگەرد پەرلەمانتارەیلیگ لە حزب یەکێتی دیموکراتی مەسیحی CDU، و یەکێتی سۆشیالیست مەسیحی CSU، وەسەرۆکایەتی جیگر سەرۆک دەسەی کاروبار دەیشتەکی لە پەرلەمان ئەڵمانیا، تۆماس ئیرندل.
وەگورەی بەیاننامەگە، لە دیدارەگە باس پەیوەندیەیل ئەڵمانیا وەگەرد عراق و هەرێم کوردستان کریا، و هەمیش باس گرفتەیل گیرهاتگ ناوبەین هەولێر و بەغدا، و جەنگ دژوە تیرۆر و نواگردن هەڕەشەی داعش، و پەیوەندیەیل عراق و هەرێم کوردستان وەگەرد دەوڵەتەیل هاوسا و دەوڵەتەیل ناوچەگە.
سەرۆک نێچیروان بارزانی باس لە سوپاس و رێزی ئەرا ئەو پاڵپشتیکردنە کرد، ک ئەڵمانیا و پەرلەمانی وە عراق و هەرێم کوردستان پیشکەشی کرد، و دەسخوەشی لە درویژکردن تەمەن کار هیزەیل ئەمنی ئەڵمانیا لەناو هاوپەیمان ناودەوڵەتی ئەرا لەناوبردن داعش لە عراق و هەرێم کوردستان، و ودانناین وە تاوانەیل جینۆساید لەبان ئێزیدیەیل.
لەلای خوەییش؛ شاند ئەڵمانی وە بەرز نرخدار رۆڵ هەرێم کوردستان لە جەنگ دژوە تیرۆر و شکستهاوردن وە داعش کرد، و دووپات کرد ک ئەڵمانیا جویر هاوبەشیگ، وە گرنگی نووڕێدە پەیوەندیەیلی وەگەرد عراق و هەرێم کوردستان، و پشتگیری لە ئاسایش و ئارامی عراق و هەرێم کوردستان کەێد، و چارەکردن گرفتەیل گیرهاتگ ناوبەینیان.
بەیاننامەگە وتیش: کاردانەوەی جەنگ لە ئۆکرانیا، رەوشەیل خوەرهەڵات ناوڕاس، سەختیەیل روی جەهان، باوەتەیل ناو ئەو گردەوبوینە بوین.
