سەرۆک هەرێم کوردستان زەنگ دەسوەپیکردن ساڵ خوەنستن نوو کوتێد

شەفەق نیوز - هەولێر

مەسرور بارزانی، سەرۆک حکومەت هەرێم کوردستان، شەوەکی زۊ ئمڕوو یەکشەممە، زەنگ دەسوەپیکردن ساڵ خوەنستن نوو 2026 - 2027 لە یەکیگ لە مەکتەوەیل پارێزگای هەولێر کوتا.

 مەسرور بارزانی، لە وتاریگ کە لەی بوونە پیشکەشی کرد، پیرووزبایی لە قوتابییەیل و مامووستایەیل و وانەوێژەیل هەرێم کوردستان وە دەسوەپیکردن ساڵ خوەنستن نوو کرد، وە دووپاتکردن لەبان ئەوەگ کە حکومەت هەرێم وەردەوام بوود لە پشتگیریکردنیان.

 سەرۆک حکومەت داوا لە خوەنەوارەیل کرد ئەرا گرنگیپیداین وە خوەنستنیان و رازانن خوەیان وە رەوشت مرۆیی و پارێزگاریکردن لە ژینگە "وەرجە گشت چشتیگ"، و وتیش: "سوپاس مامووستایەیل کوردستان کەم لەبان رکدارییان ئەرا پەک نەخستن پرۆسەی فێرکردن لە هەر قۆناغیگ لە قۆناغەیلی".

لە لای خوەیەو، وەڕێوەبەر گشتی پەروەردەی هەولێر لوقمان سەعید، خەوەر دا کە نزیکەی 500 هەزار خوەنەوار ئی ساڵە دەس وە خوەنستن کەن لەناو سنوورەیل پارێزگای هەولێر، کە بەشەو بۊنەسە بان 1632 مەکتەو.

 سەعید ئەرا ئاژانس شەفەق نیوز دیاری کرد کە 25 هەزار خوەنەوار لەناویانیە لە پۆل یەکەم سەرەتایی تومار کریانە، و ئمڕوو لە یەکەمین رووژەیل ساڵ خوەنستن نوو دەس وە خوەنستن کەن.

 ئی گامە هاوەخت تیەێد وەرد گلەوخواردن فرەتر لە 1.7 مەلیۆن خوەنەوار کوڕ و دۊت ئەرا کورسییەیل خوەنستن لە 7590 مەکتەو لە ناوچەیل جیاجیای هەرێم کوردستان، کە نزیکەی 123 هەزار خوەنەوار هاناویان ئەرا یەکەمین جار چنە ناو پۆل یەکەم سەرەتاییەو، لە سای چەودیاری فرەتر لە 168 هەزار مامووستا و فەرمانبەر.

 لە چوارچیوەی ئامادەکارییەیلی ئەرا ساڵ خوەنستن نوو، وەزارەت پەروەردە لە هەرێم خەوەر دا لە دابینکردن 19 مەلیۆن کتاو نوو، لە شان جیوەجیکردن دەسکارییەیل و نووەوکردنەیل کە 110 پرۆگرام خوەنستن لەخوەی گرد ئەرا پاڵپشتیکردن جۊری فێرکردن.