رێزداری رووژ شەهید فەیلی دە کووت
شەفەق نیوز- کوردەێل شار کووت، رێزداری کردن لە رووژ شەهید فەیلی.
کووت و گشت ئوستان واست، یەکێ لە زێد و لێزگەێل تاریخی کورد فەیلی بییە ک دە کارەسات تەعریب، ژینووسایدەێل فەرهەنگی و هووزایەتی فرەیێگ وە چەم خوەێ دییە ئوو عەگد ئەکراد و حەی ئەکرادەگەێ شاهد ئەو هەمگە جەنگین هووزەێل کورد فەیلی بییە ئەڕا زینگ ئەوهیشتن شۆناس و گیان و ژیان خوەیان.
ئەڕا یە، پارلمان ئوستان واست و شار کووت تەنیا جیێگە ک بەشێ وە نام (کوتا) ئوو کورسی ئەڕا نمایەندەگی یەک گلە کورد فەیلی وەێ دریاگە هەر چەن ک یە ئەسرێگە ک لە چەم کوور قانوون و دەستوور باڵا دتکێ وە ویر ئەو هەمگە شەهید گووڕ خەریو و بێ‌قەور و بێ‌شوون و نوون ئی کەمهووز عراقییە.
هەر ساڵ وەر ژە کورونا، دە کووت فرە لە کەسایەتییەێل کورد و عەراو و ئێرانی، دوفێشتر کوردەێل فەیلی گردەو دبین دەور یەکتری تا بیرەوەری سەرساڵەگەێ بیس و دو هزار شەهید کورد فەیلی وە رێزدارییەو بکەن، شێعرخوەنین و تئاتر وازی کردن و چشتەێلێ لەێ‌وا ئوو سروو چڕین مناڵەێل کورد فەیلی، ئەڕا ئەو بەسەزوانەێلە، لە کارەێلێ بی ک وەو بووتەو دکریا.
ئمساڵیش جوور پارەکە ک دنیا تووش کورونا هاتگە، بڕێ لەو چالاکەێلە ک هەم زاڕوو و هەم گەپ، چ ژن و چ پیاگ دە نامێیان بی دە دەور بەنایەێ یادبوود شەهید کورد فەیلی گردەو بین و وە ویرێیان شەم گریسانن و سروو چڕین و فاتا خوەنین.
شار کووت ناوەند پارێزگاێ واستە.
