یە دە مانگە ری کەێد: کابرایگ ئیسپانی لە سلێمانی روی وەرەو قەتەر کەێد.. ڤیدیۆ
شەفەق نیوز/ پیاویگ پیسپانی رەسیە هەرێم کوردستان وە ریکردن وەپا لە وڵاتەگەی هاتیە و روی وەرەو قەتەر کەێد ئەرا ئامادەبوین بازی مۆندیال تووپان ک لە تەشرین دویەم ئایندە دەسوەپی کەێد.
ڤیدیۆیگ لەلایەن ئاژانس "ئەسوشیتد پڕس" ئەمریکی نشان ئەو پیاوە دەێد لەناو جادەیل سلێمانی ری کەێد و عەرەوانەی بویچگیگ کیشێد پەرچەم ئیسپانیا هابانی.
راپۆرتەگە ک ئاژانس شەفەق نیوز ئەڵگەردانی کرد دیاری کەێد ک سانتیاگو سانشيز ئیسپانی، خەڵک مەدریدە، وەرجە دە مانگ دەسکردە ریکردن تا رەسیە هەرێم کوردستان، وە ئومید رەسینی ئەرا تەماشای بازیەیل هەڵوژادەی تووپان ئیسپانیا لە دۆحە.
پارچە ڤیدیۆگە نشان شانشیز دەێد هەنای ئەو عەرەوانە کیشێد ک وەکەمەری بەسیاگە، و چشت و خوەراکی لەی کاروانە نایەسە ناوی، هەمیش دەس بەشیگ لە هاووڵاتییەیل کورد سینێد ک لەناو جادەیل سلێمانی پیشوازی لەلی کەن.
راپۆرتەگە ئویشێد: شانسیز رووژانە لە ١٠ تا ٣٠ کیلومەتر لەی رویکردنیە وەرەو قەتەر ری کردیە.
راپۆرتەگە لەزوان شانسیز ک وەرزشکارە و راهیندەر تیمیگ تووپانە و لە مەدرید کار کەێد، ئویشێد: هویر وەی کارە کردمە ئەرا هاندان مەردم ک توەنن وە خەرجیگ کەمتر ئەرا شوین دویریگ بچن.
راپۆرتەگە لە کۆتایی وت: شانسیز ئەوەسا چەن رووژیگ لە سلێمانی مینێد، وەرجەیە بچوودە ناو ئیران، و لەورا سوار بەلەمیگ بوود تا وەناو ئاو خەلیج بڕەسێدە قەتەر.
