"داوەزیان نرخەیل".. مامر کوردستان دەرد لەلی دەێد و بڕیار قەیەغەکردن فرووشتنی
نازم عەبدولڵا، سەرۆک کۆمەڵەی خاوەن کێڵگەی مامرەیلە لە سلێمانی، ئەرا ئاژانس شەفەق نیوز دووپات کرد کە نرخ یەی کیلۆ مامر رەسیە ناوەین 2250 دينار و2300 دينار.
دیاری کرد کە داوەزیان نرخ مامر پەیوەندی وە خوازین و هەلکردن دیرێد، و ئەو دەردە کە لەی دویاییە بڵاو بوی ناچار خاوەن مامرەیلە کرد وە نرخیگ خوارتر بفرووشن، وتیش: قەیەغەکردن فرووشتن مامر ئەرا ناوچەیل ناوڕاس و باشوور وە بڕیار بەغداد بویە هوکار نەپووڕیان نرخەیل وەگەرد خوازین، کە بەرهەم مامر فرەس و داواکاری لە هەرێم کوردستان کەمە.
عەبۆلڵا داوا لە لایەنەیل حکومەتی بەغداد کرد واز لە بڕیار قەیەغەکردن مامر هەرێم کوردستان لە پارێزگایل ناوڕاس و باشوور کرد چوینکە عراق و هەرێم کوردستان پابەندن وە یەک ئاسایش خوەراکی.
وتیش: خاوەن کێڵگەی مامرەیل کەفتە وەر زەرەدر کە خەرج یەی کیلۆ مامر زنی رەسێدە 2600 دينار.
لەلای خوەییش، مامرفووشیگ وەناو مەروان خالد ئەرا ئاژانس شەفەق نیوز وت: یەی کیلۆ مامر زنی ئیرنگە وە نرخ 2500 دينار عراقی فرووشیەێد.
لەباوەت ئەو دەردەیلە کە لە گشت وڵاتەگە دەن لە مامر، وەگورەی پسپۆڕەیل، لە ناوچەیل فرەیگ لە عراق مامر کەفتیەسە دەردەیلیگ هەڕەشەی بەرهەم کەن، کە بویە مدوو داوەزیان نرخ مامر لەوەر به بڵاوبوین بیماریەیل، و لەو بیماریەیلە کە ئاگاداری لەلییان کریا "سالمونيلا و كامبيلوباكتەر"، کە لە بەکتریای باوە و مامر گرێدەی، و توەنێد تویش ئایەم بارێد ئەگەر وەشیوەی گونجیاگ رەفتار وەرد مامر نەکریەێد.
