حكومه‌ت هه‌رێم: خه‌وه‌ر له راده‌سكردن 176 تيرۆريست وه كه‌ركوك نه‌يريم
2020-05-21T21:01:07+00:00
شه‌فه‌ق نيوز/ حكومه‌ت هه‌رێم كوردستان، باس له‌وه كرد ئاگادار نيه له راده‌سكردن 176 تيرۆريست له‌لايه‌ن پارێزگاى سلێمانييه‌وه وه كه‌ركوك.
وه‌زاره‌ت ناوخوه‌يى له حكومه‌ت هه‌رێم له به‌ياننامه‌يگ ئه‌را ئاژانس شه‌فه‌ق نيوز وت: بڕيگ له هووكاره‌يل ره‌سانن هه‌واڵيگ له‌باره‌ى راده‌سكردن 176 تومه‌تبار تيرۆريستى له سلێمانييه‌و ئه‌را كه‌ركوك بڵاو كردنه و بڕيگيش باس له‌وه كردنه ئى مه‌سه‌له وه هه‌ماهه‌نگى و ئاگادارى حكومه‌ت هه‌رێم كوردستان بويه.
به‌ياننامه‌گه وت: وه‌زاره‌ته‌گه ئاشكراى ئه‌كا ئه‌را هاووڵاتيه‌يل هه‌رێم و راى گشتى ك حكومه‌ت هه‌رێم هويچ ئاگادار نه‌ويه نه وه وه‌خت ده‌سگيركردن ئه‌وانه‌و نه‌يش وه‌خت راده‌سكردنيان و مه‌سه‌له‌ى راده‌سكردنيانيش له ده‌يشت ميكانيزم هه‌ماهه‌نگى حكومه‌ت هه‌رێم وه‌ل ده‌سڵاته‌يل حكومه‌ت ناوه‌ندى بويه.
