تەڵەفیان سەد باڵندە دە مێهران
شەفەق نیوز/ دە ئی چەن رووژە، وێنەێل دڵتەزنێ لە مەلەوەرەێل بەسەزوانێ ک دە نام نەفتئاو پاشمەنەێ ئاو سەنعەتی چاڵەێلەێ نەفت "ئازەر" گیروودەوە بینە، دەس وە دەس کریا.
دۆماێ ئی کارە، پەیجووری چالاکەێل ژینگەپارێزی ئێقە فرەترەو بی ک بەرپرس سازمان موحیت‌زیست ئیلامیش هاورد وە دەنگ.
"خوڵامڕزا ئەبداڵی" بەرپرس ئی سازمانە دە ئیلام وتگە: وەداخەوە بان سەد باڵندە دە گوڵەمئاو پاشئاو سەنعەتی چاڵەێل نەفت ئازەر، تەڵەفیانە.
ئەوی وتگە: ئی چاڵەێلە دە چەمسار ئیمە، لە چاڵەێل دەروەسین و ئالوودەکەر دیانە ژمار ئوو ساڵێ یەک لە سەد دەرئامەیان ددرێ وەێ سازمانە ئەڕا یە ک بکرێگە خەرج ژینگه‌پارێزی.
ئی مەقام ناوچەئییە دە ئیلام، دەس‌دۆماجار وت: ئیمە کار و بارەێلە، دە ئی چاڵەێلە گرتیمنەسە وەر چەم ئوو دە مل هیچ کارێ ک نریاگەسە ملمان، چەم نەدقۆننیمن و وە چەم وازەو چاوداری لە "ئازەر" دکەیمن.
چاڵەێل نەفت ئازەر، هانە لێوار سنوور ئێران و عراق دە نزیکی شار مێهران ئوو دە نزیکەێ شار "بەدرە"ێ عراق.
