تورکمانەگان لە هەرێم نشان ئامادەیی خوەیان ئەرا هەڵبژاردن لەناو لیستیگ کوردستانی دەن
شەفەق نیوز/ مونا قاوەچی جیگر سەرۆک پەرلەمان کوردستان لە پێکهاتەی تورگمان، ئمڕوو سێشەممە، ئامادەیی پێکهاتەگە ئەرا بەشداریکردن لە هەڵبژاردن هاتگ پەرلەمان عراق لەناو لیستیگ کوردستانی وە گشت حزب و لایەنە سیاسیەگان لە هەرێم نشان دا.
قاوەچی لە کۆنگرەیگ رۆژنامەوانی لە دویای چەوپێکەفتن وەگەرد شاندیگ لە پارت دیموکرات کوردستان، وت: شاندەگە سەردانیگ ئەرا حزب و لایەنە سیاسیە تورکمانەگان کەێد لەوانەگ کورسی لە پەرلەمان کوردستان دەیرن و لە ئەنجومەن پارێزگای هەولێر نۆینەرن، وتیش: باس لە یەکێتی رز و هەڵوێست لە باوەتە نیشتمانیە چارەنووسیەگان لە کوردستان کردیمن.
و دووپات کرد ک حزبە تورکمانەگان پشتگیری لە ریکارەیل مقەیەتیکردن پێکهاتەی هەرێم کوردستان کەن.
دەربارەی هەڵبژاردن پەرلەمانی لە عراق، قاوەچی وت: هەر وەختیگ پەرلەمان عراق بڕیار دا ک لە ١٦ی ئوکتۆبەر لەی ساڵە هەڵبژاردنەگە ئەنجام بیریەێد، هاوپەیمان تورکمانی لەو وەختە هەڵوێست خوەی راگەینێد.
دەربارەی بەشداریکردن تورکمان لە هەڵبژاردن وە لیستیگ تایبەت یا لەناو هاوپەیمان کوردستانی، جیگر سەرۆک پەرلەمان کوردستان وت: ئیمە چەوەڕی بڕیار هەرێم کوردستان کەیمن، و ئیمە ئامادەیمن لە لیستیگ کوردستانی بچیمنە هەڵبژاردن ک گشت حزب و پێکهاتەیل هەرێم لەناوی بوون، ئەگەر سەرکردەی سیاسی لە کوردستان بڕیار دا.
