بالیۆز نوو فەرەنسا ئەرا نێچیروان بارزانی دووپات کەێد سەقامگیری هەرێم کوردستان گرنگی گەپیگ ئەرا پاریس و یەکێتی ئەوروپا دیرێد
شەفەق نیوز - هەولێر
بالیۆز نوو فەرەنسا لە لای عراق، ئەلێکساندەر گارسیا، ئمڕوو سێشەممە، دووپات کرد سەقامگیری هەرێم کوردستان گرنگی گەپیگ لە لای فەرەنسا و وڵاتەیل یەکێتی ئەوروپا دیرێد، ئەوەیش لە ماوەی چەوپێکەفتنی وەگەرد سەرۆک هەرێم نێچیروان بارزانی لە هەولێر.
سەرۆکایەتی هەرێم کوردستان، لە بەیاننامەیگ رەسیە ئاژانس شەفەق نیوز باس کرد، بارزانی پێشوازی لە بالیۆز نوو فەرەنسا کرد، و پیرۆزبایی لێ کرد وە بوونەی وەرگردن ئەرکەیل پۆستەگەی، و هیوای سەرکەفتن ئەرای خواست، و دووپات کرد لە ئامادەیی هەرێم ئەرا پێشکەشکردن گشت جۊرە پشتگیری و ئاسانکارییگ هەوەجەکریاگ ئەرا سەرخسن ئەرک دیپلۆماسییەگەی.
بارزانی، لە ماوەی دیدارەگەی، دووپات کرد گەل کوردستان "هەرگیز هەڵوێستەیل فەرەنسا و دۆستایەتی دڵسۆزانەی لە هۊر نیەوەن، وە تایبەت لە ماوەی وەختە سەختەیل"، و ستایش رۆل سەرۆک فەرەنسا ئیمانوێل ماکرۆن و تەقەلایەلی کرد لە ئەوزەڵداین پەیوەنییەیل وڵاتەگەی وەگەرد عراق و هەرێم کوردستان.
لە لای خوەیەو، گارسیا خوەشحاڵی خوەی وە وەرگردن ئەرکە نووەیلی دەربڕی، و دووپات کرد لە سووربوین وڵاتەگەی لەبان پتەوکردن پەیوەنییەیل و فراوانکردن مژارەیل دەسمیەتی وەگەرد عراق و هەرێم کوردستان، و دووپات کرد سەقامگیری هەرێم گرنگی گەپیگ ئەرا فەرەنسا و وڵاتەیل یەکێتی ئەوروپا نوێنەرایەتی کەێد.
هەردوگ لا، وەپای بەیاننامەگە، باس رەوش ناوخۆیی لە هەرێم کوردستان، و پەیوەنییەیل عراق و هەرێم وەگەرد وڵاتەیل هاوسا کردن، وەگەرد دۊیاترین پێشهاتە ناوچەییەیل.
کونسوڵ گشتی فەرەنسا لە هەرێم کوردستان، ئیمانوێل مینیۆ لە چەوپێکەفتنەگە ئامادە بوی.