بارزانی: ئەگەر بەغداد بەش هەرێم رەوانە نەکرد ئەوەسا پشت وە سێ چین لە داهاتەگان بەسیمن
شەفەق نیوز/ مەسرور بارزانی سەرۆک حکومەت هەرێم کوردستان، ئمڕوو چوارشەممە، باس لە ئومیدی لە رەسین ئەرا رێککەفتنیگ کۆتایی وەگەرد حکومەت فیدڕاڵی لەباوەت بەش هەرێم لە بوودجەی فیدڕاڵی ئەرا ساڵ ٢٠١١ کرد، وەلی لە خود وەختەگە وت: ئەگەر نەڕەسیا رێککەفتن، حکومەتەگەی ناچار بوود کارە داراییەگان خوەی رێک بخەێد.
بارزانی لە کۆنگرەیگ رۆژنامەوانی، ئمڕوو، ئاژانس شەفەق نیوز ئامادەی بوی وت: سێ چین لە داهاتەگان دیریمن، و ئەگەر حکومەت فیدڕاڵی بڕیار دا بەش هەرێم کوردستان لە بوودجەگە رەوانە نەکەێد، و ئومیدداریمن ک جوور ساڵەیل گوزەیشتە ئی بڕیارە نەیەێد، ئەوەسا کار ئەرا رێکخستن کارەیل داراییمان کەیمن، و وەهڵدەر شیوەیگ بوود ئیمە توێنیمن کاریلمان وەڕێەو بووەیمن، و وتیش: وەلی نێکەفیمنە ئاست تەمای خوەمان.
هەمیش وت: ئومید لە رەسین ئەرا چارەسەرییگ نەوڕیمنە، و ئەگەر خوازین چارەسەرییگ نا دەستوری بچەسپنن، ئەو مەوقە گشت تەقەلایلمان ئەرا وەڕێۆبردن هەرێم دەیمن، بەڵکم دانووستانەگان تا ئیسە وەردەوامن، و برادەرەیل لە بەغداد وتن گرفتەگان هونەریین، وەلی هەنای شاندەگە رەسیە بەغداد خەوەردیان کردن ک گرفتەگە سیاسیە.
بارزانی لە قسەگانی وتیش: من گەشبینم لە رەسین ئەرا رێککەفتنیگ، و چکن شاندەگە ئەرا چەن جاریگ بەڵگەیگە ک هەرێم خوازێد بڕەسێدە رێککەفتنیگ وەلی لەبنەمای دەستور عراقی.
