په‌مپيۆ باس له په‌يوه‌نديه ته‌له‌فۆنيه‌گه‌ى وه‌ل عه‌لاوى ئه‌كا
شه‌فه‌ق نيوز/ مايك په‌مپيۆ وه‌زير خارجيه‌ى ئه‌مريكا، باس له پشتگيرى وڵاته‌گه‌ى ئه‌را ئه‌نجامداين هه‌ڵوژاردنه‌يل ته‌شريعى پيشوه‌خته كرد له عراق.
په‌مپيۆ ئى قسه‌يليه له تويته‌ر وت و باس له شيواز په‌يوه‌نديه ته‌له‌فۆنيه‌گه‌ى ئه‌كا ك ئه‌نجامى داگه وه‌ل محه‌مه‌د ته‌وفيق عه‌لاوى سه‌رۆك وه‌زيره‌يل راسپارياێ و خوه‌شاڵيش بوێ وه‌و قه‌وڵه‌يله عه‌لاوى داسه‌ى له‌باره‌ى ئه‌نجاداين هه‌ڵوژاردنه‌يل پيشوه‌خته له وڵاته‌گه.
په‌مپيۆ وت: له‌نوو جه‌خت له پابه‌ندبوين وڵاته‌يل يه‌كگرتگ كردكه له پشتگيريكردن عراق و باسيش له كووتاييهاوردن وه تون و تيژى ده‌رهه‌ق وه خوه‌ينيشانده‌ره‌يل عراقى كردگه‌و داوايش كردگه وه‌رپرسه‌يل ك ئه‌و تون وتيژيه ئه‌نجام دانه بخريه‌نه ژير لێپرسينه‌وه‌ى ياسايى و رێ وشوون خواستيش ئه‌را داواكاريه‌يل ره‌واى خوه‌نيشانده‌ره‌يل له عراق بگريه‌ێده وه‌ر.
يه‌يش له‌وه‌ختيگه نويسينگه‌ى ره‌سانن عه‌لاوى وت: سه‌رۆك وه‌زيره‌يل راسپارياێ په‌يوه‌ندييگ ته‌له‌فۆنى له په‌مپيۆ وه‌پى ره‌سيه‌و له به‌ياننامه‌يگ وت: په‌مپيۆ پيرۆزبايى له عه‌لاوى كردگه وه‌بوونه‌ى راسپاردنى ئه‌را وه‌رگرتن پۆست سه‌رۆك وه‌زيره‌يل و ئوميد سه‌ركه‌فتن ئه‌راى خواستگه له ئه‌ركه تازه‌گه‌ى و هه‌ر له‌و په‌يوه‌نديه باس له دويايين رويداگه‌يل سياسى له‌بان هه‌ردوگ ئاست هه‌رێمى و جه‌هانى كرياگه وه‌ل جه‌ختكردن له خواست هه‌ماهه‌نگى و كار هاوبه‌ش و پشتگيرى ئه‌مريكا ئه‌را عراق له‌گشت بواره‌يل وه‌و جووره‌گ ك مقه‌يه‌تى له سه‌روه‌رى عراق بكا.
