وێنە.. شار بەغدیدا وە ئومێدیگ چەوەڕی سەردانەگەی پاپا کەێد
شەفەق نیوز/ خەویگە دیرێد تیەێدە جی، و رووژیگ جوور جەژن، خەڵک شار بەغدیدای زۆرینەی سیریانی لە قەزای حەمدانیە، وەیجوورە نووڕنە سەردانەگەی پاپا فرانسیس، ک شارەگە جاکلاکیەیل جووراجوریگ وەخوەی دوینێد.
«حیبر مەزن» نیاز نماز خوەنین لە کلیسەی تاهڕە دیرێد، ک جادەکان هەڵمەتیگ پاکەوکردن وەخوەیان دوینن، و کلیسەکان زڕنگەی زەنگەکان و سروودە ئاینیەکان لەناویان دەنگەوە دەن، ک خەڵک شارەگە وەخاتر سەردانەگە ئامادەی کەن.
بڕیارە ئی سەردانە سەمای مناڵەیل لە وەردەم پاپا دویای رەسینی ئەرا قەزاگە وەخوەی بوینێد.
هەرچەن سەختیەیلیگ ئەمنی لە قەزای حەمدانیە ونینەوا وە گشتی هەس، بەڵکم کەشوهەوایل خوەشی گشت ئی ووردەکاریەیلە پووشیە، و خەڵک بەغدیدا ئامادەی خوەیان ئەرا رووژیگ هەکاتی جەژن کەن.
دورەید بەهجەت ک خوەی خوورێەی رەجایە لە بەغدیدا ئەرا ئاژانس شەفەق نیوز ئووشێد: خەڵکەگە سروودە ئاینیەکان و سروودەیلیگ وەزوان عەرەوی و سیریانی و ئیتالی ئامادە کردن، وەخاتر خوەنینیان لەوەردەم پاپای مەزن، ودەنگ سروود و موسیقا لە گشت وەختەیل رووژەگە جادەیل قەزاکە گردنەسە وەر.
خەویگە تیەێدە جی
خانم رەنا نوێل یونان، لە خەڵک بەغدیدا، ئووشێد: ئەیە خەو فرە دویریگە، و سەردان پاپا فرانسیس لە خەو و خەیاڵیش نەویە، و ئی سەردانە ئەرا ئیمەی مەسیحی جوور تاقەبەشیگ ئومیدە تا لە وڵاتەگە بمینیمن و سفت خاکەگە بکریمن.
سەفا جەمیل ئەرا ئاژانس شەفەق نیوز وت: ئی سەردانە واتەیگ گیانی ئەرایان وەخوەی هەڵگرێد، و دیرن ساعەتەیل ژمارە کەن تا چەویان وە پاپا بکەفێد.
سەفا باس لە هەستەیل خوەی کەێد هەنای وە سەردانەگەی پاپا ژنەفت، وت: لە سەرەتاوە بڕوا نەکردم، و تا ئیسەیش مەغزم ئی کارە هەڵنێگرێد، وەلی ئی کارە رەنگیترین چشتە لە دەیان ساڵەو ژیانی بکەیمن، و ئەوەسا بوودە رووژ جیوازیگ هەنای لە قەرەقۆش چاومان بکەفێدە پاپای مەزن.
