کوشتن و بڕین لەلی دەرکریا.. ساڵحی: یاسای نوو ئازادی رادەربڕین خوەینشاندان مسۆگەر کەێد
شەفق نيوز- بەغداد
ئەرشەد ساڵحی سەرۆک دەسەی ماف مرۆڤ لە پەرلەمان عراق، ئمڕوو سێشەممە، ئاشکرای ئاڵشتکردن ریشەیی لەبان یاسای ئازادی رادەربڕین کرد کە ویلایەت حکومەتەو کلکریاس، دووپاتیش کرد کە ئی چاپ ئیسە ماف گشت خوەینشاندەرەیل هاناوی.
ساڵحی لە کۆنگرەیگ وە ئامادەبوین ئاژانس شەفەق نیوز وت: یاسای رادەربڕین و خوەینشاندان ئاشتەوایی کە و حکومەت ئەرا پەرلەمان کلیکرد، دەسەگە لەلی رازی نەوی، چوینکە خاڵەیلیگ لەناوی بوی زەدەی کەوهەر ئازادی رادەربڕین کەێد و دەمکوتکردن هاناوی، وە داناین مەرج وەرگردن مووڵەت وەرجە خوەینشاندان، و وەکارهاوردن واژەیەیگ نەپووڕیاگ لەڕوی یاسای گشتی و ئەدەب، ئەو کارە کە دەسەگە وە تەواوی لەلی رازی نەوی.
وتیش: لەی باوەتەو، دەسەی ماف مرۆڤ پەرلەمان کار لەلی کرد ئەرا دووارە سازیان یاساگە وەشیوەیگ مقیەتی لە گەوهەر خوەینشاندان ئاشتەوایی بکەێد، و لە دیارترین راسەوکردنەیل یەکەم لاوردن مەرجەیل وەرگردن سڵا وەرجە خوەینشاندان و ئاڵشتکردنی وە تەنیا ئاگادارکردن سەرۆک یەکەی ئیداری و پاوەننەکردن ئازادیەیل، و لاوردن ئەو واژەیلە کە فامستن نایاسایی هەڵگردوێن جویر شیوانن سیستەم.
وتیش: دەسەگە ناو یاساگە ئاڵشت کرد لە ئازادی رادەربڕین ئەرا یاسای خوەینشاندان ئاشتەوایی و کۆمەڵایەتی، و دەسەگە ئەو تەوەرەیلە لاورد کە سزایەیلیگ لەناوی بوین کە رەسێدە شەش ساڵ.
ساڵحی دووپاتیش کرد کە تەوەریگ نوو دانریاگ کە ری دەێد خوەینشاندان بوودە مانگگردن، کە ئەوە لە چاپ حکومەتی یاساگە نەویە، کە دەسکەفتیگ ماڤپەروەری گەورەش ئەرا خوەینشاندەر، قەیەغەکردن هیزەیل ئەمنی لە وەکارهاوردن گولەی زنە، و دووپاتکردن لەبان قەیەغەی هەر دەسدرویژییگ لەبان خوەینشاندەرەیل ئاشتەوایی، وە هەر دەسپیچگیگ، و داناین خاڵیگ نوو کە لە چاپەگەی حکومەت نەوی، ئەوەسە کە ری وە رووژنامەنویسەیل بیەن تا رۆماڵ خوەینشاندان بکەن، وەبی داناین ێکیێی لەناوایان، و بایەسە هیزەیل ئەمنی مقیەتیکردن تەوایگ ئەرا رووژنامەنویسەیل و میدیاکارەیل بنەن.
وتیش: لە وەختیگ دووپات کەیمن کە خوەینشاندان ئاشتەوایی نەگ دەسدرویژیکردن لەبان ماڵداریەیل گشتی یا تایبەت، کە ئەوە بایەسە ئاشکرا بوود لە رەفتار گشت بەشداربویەیل لە هەر جویلەیگ.
دیاری کرد کە رەتکردن لەلایەن ریخریاگەیل سیاسی یا فشار وە هەر جویریگ پەیوەندی وە وەجیهاوردن ماف مرۆڤ نەیرێد، بەڵکم دەر لەنوای ژاوەژاو کۆمەڵایەتی لە بانان واز کەێد، و وڵاتەگە وەبی چوارچیوەی یاساییگ هیلێد، کە بوودە مدوو کارەساتەیلیگ هەکاتی خوەینشاندان تشرین، کە کەسەیلیگ شەهید کەفتن، و تا ئیسە وە شەهید نەیریانە قەڵەم، و خەمە هویردان ئەوانە کە کەفتنە وەر گولەی پلاستیک دریا ناو سەریان تا ئیسە گڵووڵە بوینە وەبی چەودیاریکردن یا ماف یاسایی مەننە.
