ناوچەیگ عراقی لەوەر هشکەوبوین چەم خرێسان کەفێدە وە نەمان ئاو نووشین
شەفەق نیوز/ ناحیەی عەبارە خوەرهەڵات پارێزگای دیالە، ئمڕوو شەممە، داد لەدەس نەمان ئاو نووشین کرد لەوەر داوەزین ئاو چەم خرێسان.
شاکر مەلا جواد وەڕیەوبەر ناحیەگە ئەرا ئاژانس شەفەق نیوز وت: ئاو چەم خرێسان ها هشکەوبوین و کەمەوبوین گەورەیگ وئاوەگەی تەنیا بەش ویستگەی ئاو نووشین کەێد، ئەوەیش وە سەختی گەورەیگ، و رخ خوەی لە زیایبوین قەیرانەگە ونەمان ئاو نووشین نشان دا.
مەلا جواد وتیش: ٢٢ هەزار دۆنەم لە باخەوانی ناحیەی عەبارە کەفتیەسە ژیر هەڕەشەی فەوتان لەوەر هشکەساڵی وەگەرد تەواوبوین و گڵووڵەی کەرت کشتوکاڵی وەشیوەی یەکجاری و وازهاوردن لە گشت پلانەیل کشتوکاڵی، ک وەرەو قەیران وکارەساتەیلیگ ئابووری چوود زەرود خەڵکەگە دەێد.
هەمیش وت: هەرچن پڕۆژەی خوار خاڵس دریاسە دەم چەم خرێسان، باوجی عەبارە دویاترین ناوچەس ک ئاوەگە بڕەسێدە پی، و تەکانەیل کەمیگ وەپی رەسێد، و ئومید لە مەرەقەزکردن بەنداو دەربەندیخان دیریمن ک ئەرا دەریاچەی حەمرین تەکان دەێد تا لای فرەیگ لە خوازین سەرەکی ئەرا ئاو نووشین و رزگارکردن باخەیل پڕەو بکەێد.
