لە بابل.. ناڕەزایی لەبان کەمئاوی و هشکەوبوبن چەمەیل (وینە)
شەفەق نيوز- بابل
دەیان کەس لەبان ری سەرەکی ناوەین پارێزگای بابل و قادسیە، ئمڕوو جمعە، دەرچگن وە ناڕەزایەتیی لەبان کەمئاوی و هشکەوبوین چەمەیل لە ناوچەی مجەریە، لە شار حلە ناوەند پارێزگاگە.
ئەو خوەینشاندانە بەشداریکردن فراوانیگ لەلایەن خەڵک ئەو ناوچە وەخوەی دی کە بیزاری خوەیان نشان دان لە کووروبوین تەواو چەم مەجەریە، کە سەرچەوەیگ سەرەکیە ئەرا بڕیگ لە ئاوای و گەڕەکەیل شار حلە.
لەو خوەینشاندانە، ری سەرەکی وە سزانن تایەر و ریگریکردن لە رەدبوین ماشینەیل بوی، وەگەرد بڵاوبوین ئەمنی خەسیگ ئەرا کۆنترۆڵکردن خوەینشاندانەگە.
هەرلە وەڕیەوبەر سەرچەوەیل ئاو لە بابل، و وەڕیەوبەر ئاو بابل وەگەرد بڕیگ لە وەرپرسەیل پارێزگاگە لەناو ئەو خوەینشاندانە ئامادە بوین، کە قسە ئەرا مەردم کردن و گووش لە پەڵپەیلیان گردن.
ئامادەبوین وەرپرسەیل ناڕەزاییەگە کپەو کرد، و پەیمان چارەسەرکردن گیچەڵەیل و پیشکەشکردن چارەسەرەیل وەردەوامدار لەی رووژەیل بانانە دریا.
دویەکە پەنجشەممە، وەزارەت سەرچەوەیل ئاو راگەیان کە ئمساڵ گەنترین خشکەساڵیە لە ساڵ 1933ەو تا ئیسە، کە وت: ریژەی ئاوەگە لە گوڵەم دیجلە و فورات رەسیە 27% وەچەو پارەکە، بیجگە لەوە ئامار ئاو لە ئەمار و بەنداوەیل ئیرنگە رەسیەسە 8% لە توانای هەڵگردن، واتە وە ریژەی داوەزیان 57% وەچەو ساڵ گوزەشتە.
