رەوانەکردن دۆسیەی فروشیار گووشت وەراز لە نەجەف ئەرا دادگا
شەفەق نیوز- نەجەف
سەرچەوەیگ دادوەری، ئمڕوو شەممە، خەوەردا لە رەوانەکردن دۆسیەی فروشیار گووشت وەراز کە وەرجە چەن رووژیگ لە یەکیگ لە کۊچەیل نەجەف دەسگیر کریا، ئەرا دادگای تاوانەیل پارێزگاگە.
سەرچەوەگە ئەرا ئاژانس شەفەق نیوز وت، کە "ئی رێکارە دۊای تەواوبۊن بەڵگە و چەسپانیەیل لەبان فروشیار گووشت وەراز جیوەجی بۊ، و چەوەڕی دەرچگن بڕیار کەێد وەپای یاسای سزاداین عراقی".
سەرچەوەیگ ئەمنی، چوارشەممەی گوزەشتە، خەوەر داگە ئاژانس شەفەق نیوز، وە دەسگیرکردن خاوەن دوکان قەساویگ لەلایەن تیمیگ ئەمنی لە هەواڵگرییەو کە وەرازەیل کۊیەیی لە هۆر ناحیەی حوڕیەی قەزای کوفە راو کردیاد، و وە هاووڵاتییەیل فرووشتیادیان چۊ (گووشت قیمە) لە ناوچەی ناوڕاس شار نەجەف.
باوجی شارەزای یاسایی و دەستووری حەبیب قوڕەیشی، دووپات لەبان نەوین دەقیگ سزایی ئاشکرا لە یاسادانان عراقی کرد کە فرەوشتن گووشت وەراز وە خوەی تاوانبار بکەێد، دیاری کرد کە حەرامکردن گووشت وەراز لە شەریعەت ئیسلامی - لە رۊ تاوانکارییەو وە مانای ئەوە نییە - کە هەر کاریگ پەیوەندی وەپی دیرێد لەخوەیەو ئاڵشت بوود ئەرا تاوان، تا ئەو وەختە کە دەقیگ یاسایی نەود کە کارەگە وە شیوەیگ دیاریکریاگ تاوانبار بکەێد.
