روانگەیگ عراقی: مەرەقەزکردن ئاو تورکی ئەرا دوو مانگە و سوودیگ نەیرێد

شەفەق نيوز- بەغداد 

روانگەی عراق سەوز، ئمڕوو سێشەممە، ئاشکرا کرد کە ئەو ئاوە کە تورکیا وەرەو عراق مەرەقەزی کرد، تەنیا ئەرا دوو مانگە، دووپاتیش کرد کە 500 سەر گامیش لەوەر هشکەساڵی فەوتایاس.

لە بەیاننامەیگ رەسیە ئاژانس شەفەق نیوز وت: ئەگەر خاس بنووڕید وەو بەیاننامە کە تورکیا لەبان مەرەقەزکردن ئاو ئەرا چەمەیل دیجلە و فورات دەری کرد، لەناوی ئاشکرا کرد کە ئەوە ئەرا مانگەیل تەمووز و ئابە، وتیش: ئەو مەرەقەزکردنە بیخودە، و هاتێ عراق کارەساتیگ ئاوی دویای ئەو دوو مانگە وەخوەی بوینێد.

   وتیش: تا ئیسە ئەو مەرەقەزکردنە پارێزگایەیل باشوور لە تینگی رزگار نەکردگە، و زوان شووری لە پارێزگای بەسرە نەماڵیە تا ئەرا ئایەم بگونجێد، کە وەیجویرە هیچیگ ئاڵشت نەویە.

  دیاری کرد کە ئەو هشکەساڵیە کە لە ساڵەیل گوزەشتە لە عراق بوی، زیاتر لە 500 سەر گامیش لە پارێزگایل باشوور و ناوڕاس لەدەسداگە، دووپاتیش کرد کە گشتی زانێد کە یەکیگ لەو گامیشەیلە جویر کارخانەیگ شیرەمەنیە، کە هیشت خاوەنیان گامیشەیل بفرووشن، ئەرا خواردن گووشتیان، کە هەڕەشەی سامان ئاژەڵ لە وڵاتەگە دەێد.

   دووپاتیش لە گرنگی ئەوە کرد کە لایەنەیل وەرپرس کار خوەیان بکەن ئەرا زیایکردن مەرەقەزکردن ئاو، و رزگارکردن عراق لە هشکەساڵی و تینگی لەی مانگەیل بانانە.

 وەرجەیە، رەمەزان حەمزە پسپۆڕ ستراتیژی و سیاسەتەیل سەرچەوەیل ئاو، ئاشکرا کرد کە عراق سوود لە زیایکردن مەرەقەزکردن ئاو لەلایەن تورکیا سوود نیەگرێد، وتیش: ئی ئاوە چەم دیجلە خاسەو کەێد.

  حەمزە ئەرا ئاژانس شەفەق نیوز وت: عراق نیەتوەنێد سوود لەو بڕەیل ئاوە بگرێد کە تورکیا لەی دویاییە مەرەقەز کرد، و بڕیار حکومەت عراق وە وسانن وەرز کشتوکاڵی ئمساڵ دەرفەتەیل سوودگردن لەی تەکانەیل ئاوە کەمەو کرد.