گەرمیان وە چنین ١٥ هەزار دار ئاهەنگ ژینگەی کەێد
شەفەق نیوز/ ئیدارەی گەرمیان لە هەرێم کوردستان،ئمڕوو سێشەممە خ ئاهەنگیگ وە رووژ ژینگەی گەرمیان کرد، وە ئامادەبۊن سەرپەرشتیار ئیدارەی گەرمیان و سەرۆک دەسەی ژینگە لە هەرێم کوردستان و بڕێ لە پسپۆڕەیلە.
جەلال شێخ نور سەرپەرشتیار ئیدارەی گەرمیان لەو ئاهەنگە ک ئاژانس شەفەق نیوز ئامادەی بۊی وت: توانای گلەوداین سەردەمەگە وەرەو دۊیا نەیریمن، باوجی توانای دار چنین دیریمن، و شارەیلمان بکەێمنە ژینگەپارێزی، و دوارە باخچەیلمان بسازیمن، و سیستەم خوەراکمان ئاڵشت بکەیمن، و چەمەیلمان پاکەو بکەیمن، ئیمە ئەو نەوەیمنە ک توانای ئاشتەوایی وەر سرووشت دیریمن، یە دۊیاترین دەرفەتە تا چشتەیل ئەمەوبنەیمنە شۊن خوەیان، تا نوای کارەسات کەشوهەوابنگریمن، وزیایبۊن پیسی و زواڵە بووسنیمن، و نوای گومابۊن ڕەنگاوڕەنگی بایۆلۆژی بگریمن، هەمیش تو توانای مقیەتیکردن ئەوەگ مەنیە دیرێ، تا خراوەگە خاسەو بکەێ.
وتیش؛ گرنگیدان وە ژینگە تەنیا لەلای دامەزراوەیل حکومەتی نییە، باوجی خوەی ئەرکیگە کۆمەڵایەتی، بەڵکم خوەی ئەرک خود تاکە کەسەیلە، چۊنکە ژینگە مقەیەتی نێکریەێد، ئەگەر بەشداریکردن تاکەیلە نەوود.
عەبدولڕەحمان سەدیق سەرۆک ژینگەی کوردستان، باس پەسەنکردن رووژەیلیگ جیاجیا ئەرا هەر ناوچەیگ لە هەرێم کوردستان تا ئاهەنگ بکەێد، و هووکار پەسەنکردنیان کرد، وت: دەسەیلیگ پەیوەندیدار لە گەرمیان رووژ ٢٢ ئەیلوول پەسەن کردن، تا بوودە روووژ ساڵانەی ژینگە لە گەرمیان، وتیش: ئاهەنگەگە لەی رووژە ک دۊیای رووژە پەسەنکریایەگە لەوەر ئەوە بۊی ک ماوەگە بەش ئامادەکاریەیلە نەکرد ئەرا ئاهەنگ لەو رووژە، ک هیشت ئاهەنگەگە بکەفێدە ئی رووژە، و ئەوەسا لە ساڵەیل ئایندە لە رووژ خوەی ئاهەنگ کەیمن.
سەرۆک دەزگای ژینیە باس کرد ک گرنگیدان جیهانی وە ژینگەینماوەی پەنجا ساڵ گوزەیشتە زیایەو بۊی، تایبەت لە دە ساڵ دۊیاییە، ک میدیایل راگەیانن وەشیوەی وەردەوام جەخت لەبان دیاریکردن ئەو چشتەیلە کرد ک پەیوەندی وە ژینگە دیرن، وەتایبەت ئاڵشبۊن کەشوهەوا، ک دەسمیەتی دا ک گرنگیدان وە ژینگە بڕەسێدە ئەو ناوچەیلە ک کاریگەری وە گرفتەیل ژینگە بۊینە.
وتیش: حکومەت هەرێم کار راسی ئەرا زیایکردن شۊنە سەوزەیلە کرد، و لەبنەمای ئیستاندەرەیل جیهانی ئەرا ئامادەکردن تووکڵ سەوزیگ ئەرا ژینگەی گشت هەرێم کوردستان.
هەرلیوا، ئاهەنگ رووژ ژینگەی گەرمیان تا یەک هەفتە وەردەوام بوود، و ئەوەسا چالاکیەیلیگ کۆمەڵایەتی ڕەنگاوڕەنگی لەناوی بوود، جۊر چنین ١٥ هەزار درەخت لە ناوچەیل گەرمیان.
