دوو نۊنەر کۆتا لە فەیلی و شەبەک باس بڕیار دادگای فیدراڵی کەن
شەفەق نیوز/ پەرلەمانتار حسێن مەردان نۊنەر کۆتا لە کورد فەیلی، و پەرلەمانتار وەعەد قەدو نۊنەر کۆتا لە شەبەک، ئمڕوو چوارشەممە، راگەیانن بڕیارەگەی دادگای فیدراڵی وە نادەستووری نۊنەرایەتی کەمینەیل لە پەرلەمان عراق وە کورسیەیل کۆتا ئەوەسا لە خول پەرلەمانی هاتگ کەفێدە ئاست جیوەجیکردن.
مەردان و قەدو لە کۆنگرەیگ رووژنامەوانی هاوبەش لە پەرلەمان وتن: دۊکە دادگای فیدراڵی بڕیاری دەربارەی باوەت شمارەی کورسیەیل "کۆتا"ی کەمینەیلە دەرکرد، و ئی بڕیارە ئەرا جیوەجیکردن بنەمایل دەستوور و یەکێتی عراق هات و مقیەتیکردن چنین عراقی ک لە پێکاتە و مەزهەوەیلیگ هاتگە ک هەزاران ساڵ وەیەکەو ئەوزەڵ کردنە.
هەردوگ نۊنەرەگە پیشوازی وە بڕیار دادگای فیدراڵی کردن ک دادڕەسیگ بۊ ئەرا ئی پێکاتەیل رەسەنە، و داوا لە ئەنجومەن نۊنەرەیل عراق کردن لە گرنگی جیوەجیکردن بڕیار دادگای فیدراڵی و زۊکردن لە راسەوکردن یاسای هەڵبژاردن ئەنجومەن نۊنەرەیل شمارە ٩ ئەرا ساڵ ٢٠٢٠،وەوجۊرەگ وەگەرد بڕیار دادگای فیدراڵی بگونجیەێد، ک خوەی پابەندە لەبان گشت دەسەڵاتەیل.
ودیاری کردن ک بریار دادگای فیدراڵی جیگرە، وئەوەسا لە خول پەرلەمانی هاتگ کەفێدە جیوەجیکردن ک شمارەی ئەو کورسیەیلە ئەرا یاسای هەڵبژاردن ک تەگبیرە راسەو بوود، ئەوەسا هەڵبژاردن پەرلەمانی هاتگ گرێدەو.
دادگای فیدراڵی باڵا، دۊکە سێشەممە، بڕیار دا ک نۊنەرایەتی کەمینەیل لە ئەیزیدی و شەبەک و کورد فەیلی لەپەرلەمان عراق وەڕی کوسیەیل کۆتا نادەستووریە.
دادگا لە بەیاننامەیگ دۊکە وت: ئەرا گورجکردن رووڵ نیشتمانی و وەدەسهاوردن یەکسانی و مقەیەتیکردن یەکێتی نیشتمانی ئەرا پێکاتەیل ئەیزیدی و شەبەک و کورد فەیلی، دادگای فیدراڵی بڕیار دەێد نۊنەرایەتی ئەو پێکاتەیلە لە ئەنجومەن نۊنەرەیل نادەستووریە، و بایەتە وەگەرد پێکاتەی مەسیح و سابئی یەکسان بوون.
