داوا کریەێد دەوام ئیواران بکریەد هچان...ناوچەیلیگ لە عراق کەفنە ژیر واران رفتیگ
2023-03-15T07:43:19+00:00
شەفەق نیوز/ ناوچەیل خوەرئاوا و باکوور عراق، ئمڕوو چوارشەممە، کەفنە ژیر کاریگەری واران وارین وە گورجی بەرزیگ ک ئەوریگ وارانناوی ئەڵگردیە، وەپای ئەوەگ کەشناس خەوەردایە.
کەشناس عەلی جابر زیادی وە ئاژانس شەفەق نیوز وت، مەزەنەیل دیاریکەن وڵاتەگە کەفێدە ژیر کاریگەری واران وارین وە گورجی وەگەرد ئەور وارانناویگ جاروەجار گرمەهڕ ها وەگەردیا و لەبڕیگ شوین رفتە وە تایبەت باشوور موسڵ و خوەرئاوای ئەنبار و شارەیل میسان و کوت و باکوور و ناوڕاس زیقار.
زیادی وتیش، لە شارەیل فورات ناوڕاس و بەغدای پایتەخت تونی وارانەگە مابەین مامناوەند و لە بڕیگ ناوچە رفتە، دیاریکرد لە نیمەڕو ئمڕوو وارانەگە رفتەو بوود.
زیادی داوا لە لایەنەیل پەیوەندیدار کەێد دەوام مەکتەوەیل ئیواران پەکبخەن تا لە لافاو شوینەیل نزم و ریەیل دویرەو بکەفن.
