"چەتەیل کراچی" و"باخەیل گەورا" ئارامی لە عەبارەی دیالە خراوکەن
2020-11-06T10:59:26+00:00
شەفەق نیوز/ وەرپرسیگ خۆجێیی لە دیالە، ئمڕوو جمعە، شکستهاوردن هێزە ئەمنیەگان لە رووداو و پەلامارە تیرۆرەگان لە ناوچەیل ناحیەی عەبارە سەروە دیالە وە بڕیگ لە هووکار دانا، و ئاماژە کرد لە هەسی چەتەیلیگ خراوەکار پاڵپشتی لە لایەنەیلیگ دیرن ک ناویان نەهاورد.
عەبدولڵا ئەحمەد حەیالی قایمقام بەعقوبە ئەرا ئاژانس شەفەق نیوز وت: وەردەوامی پەلامار و رووداوە ئەمنیەگان لە ناوچەیل ناحیەی عەبارە چنەو ئەرا لاوازی تەقەلا هەواڵگریەگان و نەوین ناکاوی ئەمنی و جوگڕافیای پیچەڵپیچ ناحیەگە و باخە گەوراگان و ناوچەیل کشتوکاڵی فراوان ک کۆنتڕۆڵ کردنی سەختەو کەن وەبی پلانەیل گشتکیر و فراوانیگ نووای مەترسی چەتە تیرۆرەگان بگرن.
حەیالی دیاریکرد ک ئەندامەیل داعش و چەتەیل پەیوەندی دار وەپیان، پلانەیل شاراوەیل ناکاوییگ وەکار تیەرن ئەرا جیوەجیکردن پەلامارەیل دزانە ک ئامانجیان لەلیان خوەی چەسپانن هەسی خوەیانە، و ئەندامەیل داعش توانای ئاشکرایی لە دەرکەفتنیان لە ناوچەیل عەبارە نەیرن.
و ئاماژە کرد لە چەتەیلیگ کراچی لە چەن لایەنیگ پشتگیری کریانە، ئەرا دروسکردن ئاژاوەی ئەمنی و شیواشیویگ ئەرا مەبەستەیلیگ تایبەت، وەبی ئاشکراکردنیگ لەلایەن حەیالی ئەرا شناسنامەی ئەو لایەنەیلە، و هەمیش وەگەرد ململانەیل و تووڵەیلیگ هووزانە کڵەکە بوون وەگەرد هووکارەەیل توندوتیژی لە عەبارە.
قایمقام عەبارە بانگواز کرد ئەرا نواگردن پەلامارەگان و ئاڵوزیە ئەمنیەگان لە بەشیگ لە ئاوایەیل عەبارە وە داناین کامیرایل چەودیری نوو لە ری و باخەکان ئەرا چەودیری لە هەر جوولەیلیگ یا کارەیلیگ گومان لیکریاگ ک ئەمن کۆمەڵگا بکەنە ئامانج، وبڵاوکردن خاڵەیلیگ ئەمنی خەسیگ ئەرا کەمەوکردن جوولەی تیرۆرستەگان و نوواگردنیان لە جیوەجیکردن پلانەیلیان.
