بەغداد: کوشیان و زەخمداری ٤ کەس و پەیاکردن تەرم کەسیگ نەناسیاگ
2024-01-19T09:09:36+00:00
شەفەق نیوز/ سەرچەوەیگ ئەمنی لە بەغداد، ئمڕوو جمعە، خەوەردا لە کوشیان و زەخمداری چوار کەس وە رویداویگ هاتوچو خوەرئاوای بەغداد پایتەخت، و هیزەیل ئەمنی تەرم پاییگ نەناسیاگ پەیا کردن.
سەرچەوەگە ئەرا ئاژانس شەفەق نیوز وت: ماشینیگ داد لە پەیمانەی پیەڵ رەزوانیە لە خوەرئاوای بەغداد کە پلیا و دوو کەس لەناوی کوشیان، و دوو کەسیش زەخمدار بوین.
دیاری کرد کە هیزیگ ئەمنی رەسیە شوین رویداوەگە و تەرمەیل ئەرا پزشک دادوەری برد، و زەخمدارەیلیش ئەرا خەسەخانە.
لەلاییگ ترەک، سەرچەوەگە وتیش: هیزیگ ئەمنی تەرم پیاییگ نەناسیاگ پەیا کرد و شوین گولە وەسەریەو بوی، لە باخیگ چووڵ بە قەزای مەدائن فڕە دریاس.
وتیش؛ تەرمەگە ئەرا پزشک دادوەری بریا تا بناسنەی و بیەنەی دەس خاوەنی.
