بەغداد.. یەکەمین مردن و ٤ تویشهاتن وە بیماری تەو خۊنوەربۊن
شەفەق نیوز/ محمد جابر عەتا، پارێزگار بەغداد، ئمڕوو شەممە، توومارکردن یەک مردن و چوار تویشهاتن وە بیماری تەو خۊنوەربۊن راگەیان.
ئەوەیش لە کۆنگرەیگ رووژنامەوانی لەلایەن پارێزگار هات، دویای گردەوبوینیگ تایبەت وە دەرکەفتن بیماریەگە، ک جینشین هونەری وەزارەت کشتوکاڵی، و بڕیگ لە وەرپرسەیل فەرمانگەی ڤێتێرنەری، وفەرماندەی پۆلیس بەغداد، و وەڕیەوبەر گشتی تەندروسی بەغداد/ رەسافە، و بڕیگ لە وەرپرسەیل یەکەیل ئیداری ئامادەی بوین.
عەتا وت: لەی رەسافەی بەغداد دوو تویشهاتن وە تەو خۊنوەربۊن توومار کرد، و لای کەرخیش سێ تویشهاتن توومار کرد، یەکیگیان مرد، ئەو کارە ک گرنگی جویلەکردن زوی ئەرا مقیەتیکردن لەی بیماریە نشان دا، تایبەت ک بەشیگیان خاسەو بوین، ودیاری کرد ک گردەوبوینەگە ئەرا نواگردن بیماریەگە تیەێد، ک تویشهاتنەیلیگ تاکانەس نیەڕەسێدە ئاست پەتا.
وتیش: شوینیگ دیاری لە بەغداد نییە ک بیماریەگە لەناوی ئاشکرا بویە، باوجی پارێزگای بەغداد ئەوەسا چەن ریکاریگ جیوەجی کەێد ئەرا نواگردنی، لەڕی چەودیریکردن ئاژەڵ لە بەشیگ لە ناوچەیل، و ئەرا وەڕیەوبەرەیل قەزا و ناحیەیلە رینمایی دا چەودێری کوشتارگایل هەڕەمکی بکەن وئەوانەگ مووڵەت نەیرن و شوینەیل فرووشتن ئاژەڵ.
عەتا داوای گردەوکردن رەنج و تەقەلای گشت وەزارەتەیل کرد، تایبەت وەزارەت تەندروسی، و کشتوکاڵی، و ژینگە، وئەو لایەنەیل وە راگەیانن و هوشیاری، و ئەو یەکەیل ئیداری، و جەخت لە گرنگی رەفتارکردن گەونجیای وەگەرد بیماریەگە کرد.
پارێزگار بەغداد دیاری کرد ک وەزارەت کشتوکاڵی توانای گیرهاوردن تویشهاتنەیل بیماریەگە دیرێد تا کۆنترۆلی بکەێد، تایبەت ک پارێزگای بەغداد ئەوەسا ریکارەیلیگ سەخت دژوە پێشێلکارەیل جیوەجی کەێد، وەلایەن فەرماندەیل ئۆپراسیۆن و پۆلیس بەغداد.
