بەرزەوبوین ناکاوییگ لە نرخ دۆلار لە بەغداد و هەرێم کوردستان
شەفەق نیوز/ ئمڕوو یەکشەممە ١٣ کانون یەکەم ٢٠٢٠ ، نرخ دۆلار لە بازاڕەگان بەغداد ولەهەرێم کوردستان دووارە بەرزەوبوی.
پەیامنێر ئاژانس شەفەق نیوز وت: بۆڕسەی کیفاح ناوەندی نیمەڕوو ئمڕوو، رەسیە ١٢٧٤٠٠ دینار عراقی وەرانوەر ١٠٠ دۆلار ئەمریکی تۆمارکرد، و بۆڕسەی حارسیە لە بەغداد ١٢٧٤٠٠ دینار وەرانوەر ١٠٠ دۆلار تۆمار کرد.
شەوەکی ئمڕوو نرخ دۆلار لە بۆڕسەی کیفاح رەسیە ١٢٦٩٠٠ دینار وەرانوەر ١٠٠ دۆلار ئەمریکی.
پەیامنێرەگەمان ئاماژەدا ک نرخ فرووشتن و سەنەین لە بازاڕە ناوخۆیەگان لە بەغداد هەمیش بەرزەوبوی ک نرخ فرووشتن رەسیە ١٢٨٠٠٠ دینار عراقی، ونرخ سەنین رەسیە ١٢٧٠٠٠ دینار وەرانوەر ١٠٠دۆلار ئەمریکی.
لە هەولێر پایتەخت هەرێم کوردستان نرخ دۆلار هەمیش بەرزەوبوین وەخوەی دی ک نرخ فرووشتن رەسیە ١٢٧٣٠٠ دینار وەرانوەر ١٠٠ دۆلار، و سەنین بویە ١٢٧٠٠٠ دینار وەرانوەر ١٠٠ دۆلار ئەمریکی.
