باڵ چەکداریگ ئویشید سه‌ربازگه‌ی سپایکەر له ئاسمانه‌و په‌لامار دریا
شەفەق نیوز/ عادل گەڕعاوی قسەکەر فەرمی وەناو جمشت ''ئەنساڕولڵاه ئەوفیا''، ئمڕوو سێشەممە، ئشاره‌کرد وە سێ بەڵگە ئەوە چەسپنێد ک کامپ سەقەر و سپایکەر کەفتنە وەر په‌لامار ئاسمانی. گەڕعاوی ئەرا ئاژانس شەفەق نیوز وت: فرە بەڵگە هەس چەسپنێد ک ئەمارەیل چەکەگان لە کامپ سەقەر و سپایکەر کەفتنە وەر گورز ئاسمانی دەیشتەکییگ، لەلیان ئەوەسە ک حکومەت عراق وەزوی راگەیان ک تەقینەوەگە لەوەر بەرزی پلەی گەرمی بویە، دویای چەن خولەکیگ لە تەقینەوەگە وەبی هیچ لێکۆڵینەوەیگ. وتیش: ئەو چشتەگە ئەوەسە ک رەوانگەی فڕۆکەوانی نەناسریاگ خەسیگ لەبان کامپەگان کریا لەمەوقەی تەقینەوەگە، وئەیە بەڵگەی ئاشکرایگە ئەرا ئەوە ک کەفتنەسە وەر په‌لامار، وەتایبەت ک ئی کامپەیلە وەرجەیە هەمیش کەفتنەسە وەر ئیجوور پەلامارەیلە لە لایەن فڕۆکەیل ئەمریکا و ئیسڕائیل، وەگورەی ئاشکراکردنەیل لایەنە حکومەتیەگان. گەڕعاوی جەخت کرد ک بایەسە حکومەت عراق ئاشکرای راسیەگەی ئی تەقینەوەیلە بکەێد، ونوای وەئامانجکردن بارەگا سەربازیه فەرمیەگان بگرێد، و هەمیش باڵەیل وەرخودان عراقی ماف بەرسڤداین دیرێد لەبان هەر پەلاماریگ دەیشتەکی دژوە سەروەری وڵاتەگە.
