بازرگانی عراق راگەینێد خۆژینی لە ''ئارد'' و دادکەێد لە ''روون وشەکەر''
شەفەق نیوز/ ئەحمەد جبوری وەزیر بازرگانی، ئمڕوو یەکشەممە، راگەیان خۆژینی لە بەرهەم ئارد دویای وەرگردن ٥ مەلیۆن تەن لەلایەن ئەمارەیل وەزارەتەگە، وهەمیش هووکارەیل دیر دابەشکرن روون وشەکەر ئاشکراکرد.
جبوری لە بەیاننامەیگ رەسیە ئاژانس شەفەق نیوز وت: دویای تەواوبوین هەڵمەت سەنینەگە ئەرا بەرهەم گەنم، عراق خۆژینی وەدەس هاورد لەی پێکهاتە، دویای وەرگردن ئەمارەیل وەزارەتەگە ئەرا ٥ مەلیۆن تەن، ودیاری کرد ک ئاردەگە ک دابەشکریا خوەی لە ئارد عراقی پلە یەکەم بوی.
وتیش؛ وەزارەتەگە توێنست خۆژینی خواردەمەنی وەدەس بارێد لە بەرهەم گەنم، ک بەش ناوخۆیی کەێد و خوازین ئەرا هاوردە نیە.
لەباوەت کارت بایعەگە، جبووری دیاریکرد، ک کۆمیتەیلیگ لە وەرین دروس کریاگە ئەرا داناین پێشنیار وبۆچونەگان ئەرا گەشەوەپیدان پێکهاتەیل بایعەگە، ودیاری کرد ک بڕیگ پێشنیار پێشکەش کردنە، لەلیان ک لە دەسەڵات وەزارەتەگەس و لەلیان هالە دەسەڵات ئەنجومەن وەزارەتی ئەرا ئابووری، وهەمیش لە دەسەڵات ئەنجومەن وەزیران، ک ئەوەسا توێژینەوەی ئی پێشنیارەیلە کریەێد.
جبوری وتیش؛ ئامانجە سەرکیەگەی وەزارەت بازرگانی دابینکردن پێکهاتەیل کارت تەموینەگەس و دابەشکردنی لە وەختەیل دیاریگ ئەرا هاووڵاتیەیل، وتیش؛ گەنمەگە وەشیوەی سروشتی دابەش کریەێد و هیچ گرفتیگ لەلی نیە، ک بەشە شەشەمەگە لە ئاردەگە دابەش کریا، بەڵکم ئەو پێکهاتەگان تەرخان کردن پویل خوازن، چوونکە بایەسە وەزارەتەگە هاوردەیان بکەێد ئەراچارەسەرکردن گرفتەگانیان.
و لەباوەت دیرهاتن روون وشەکەر، وەزیر بازرگانی وت؛ هووکارەیل دیرهاتنیان چوودەو ئەرا کەم دارایی، ک حکومەتەگە لە سای رەوش دارایی سەختیگ دروس کریا، و هەمیش لەوەر وەرگردن وەزیریگ وەجینشینی لە وەزارەتەگە ئەرا ماوەی دیاریگ، وئاماژەدا ک ئەو باوەتە رای گشتی هاوردە جواو، وەلی کەموکوڕیەگە لەلایەن وەزارەتەگە نیە، بەڵکم تەرخان نەکردن داراییە لە ئاست پێویست.
جبوری ئاماژەدا ک وەزارەتەگە داوا لە دارایی کردگە ئەرا تەرخانکردن پویل، و رووژ چوارشەمەی گوزەیشتە پویلەگە دابین کریا، وشایەت لە رووژەیل ئایندە روون وشەکەر دابەش بکریەێد.
