پەیاکردن تەرم پیای پیریگ و کوشیان کەسیگ وە رویداویگ لە باشوور عراق

شەفەق نيوز - زیقار

سەرچەوەیگ ئەمنی لە پارێزگای زیقار، ئمڕوو چوارشەممە، خەوەردا لە توومارکردن چەن رویداویگ ئەمنی لە پارێزگاگە، لەناویان پەیاکردن تەرم پیای پیریگ کوشیاگ لە باکوور ناوەند پارێزگاگە.

 سەرچەوەگە ئەرا ئاژانس شەفەق نیوز وت: هیزیگ ئەمنی تەرم پیاییگ پیر پەیا کرد کە وە گولە کوشیاس و تەرمەگەی لەناو زوڵدان لە ناوچەی گەڕەک ئەمین ناوڕاس قەزای شەترە باکوور پارێزگای زیقار فڕە دریاس، دیاری کرد کە هیزە ئەمنییەیل تەرمەگە ئەرا پزشک دادوەری بردن ئەرا تەواوکردن ریکارەیل یاسایی.

سەرچەوەگە وتیش: رویداویگ هاتوچو ناوەین ماتووڕسکڵیگ و ماشینیگ لە ناوچەی تەللەحم باشوور شار ناسریە بویە هوکار کوشیان خاوەن ماتووڕسکڵەگە وەکوتپڕ، و زەخمداری کەسیگ ترەک وەگەردی بویە.