پاپا: تیرۆر پەلامار بەشیگ لە مێژوو عراق دا وەلی مەسیحی ومسوڵمانەیل ئاشتی دروس کردن
شەفەق نیوز/ پاپا فرانسیس، ئمڕوو شەممە، هان ئاینەکان ئەرا نواگردن تیرۆر و توندڕەوەی دا، وهەرکە ئاین لەی شیوە وەکار تیارێد، و دووپات کرد ک کۆمەڵە تیرۆرستەکان بەشیگ لە مێژوو عراق ویران کردن.
ئەوەیش لە وتاریگ لە نمازیگ یەک دەسی لەناونی ئاینەکان هات لە شار ئاسەواری ئوور شوون پەیابوین ئیبراهیم پەیغەمبەر، و پاپا وتیش؛ لەی شوونەو باوەڕی و یەک خودایی لە زەوی ئیبراهیم پەیغەمبەرمان دەس وەپیکرد.
وتیش؛ تیرۆر و توندڕەوەی لە ئاین نێەتیەێد، ولە یاد نەوەیمن ک تیرۆر بەدوەکار ئاین تیارێد، و کارەگە هالە لای خوەمان ئەرا مقەیەتیکردن ئاین دژوە هەرکەس خوەی وەپی پوەشێد.
هەمیش پاپا ئاماژە کرد ک ئی وڵاتە جەنگ ویرانی کرد، و گشتی زیان وەخوەیان دین، و ئەیزیدیەکان وەتایبەت ک فرە لەلیان مردن، و فرە لە ژن وماڵەیلیان رەفتار خراو وەگەردیان کریا.
و دووپات کرد ک هەنای تیرۆر پەلامار ئی وڵاتە دا، پەلامار بەشیگ لە مێژوو دا، ک خوەی کلیسە و دێرەکان بوی، باوجی لەی ماوەی تاریکە، هەسارەیل هەڵاتن، و مەسیحیەکان و موسوڵمانان دەسکردنە دروسکردن ئاشتی، و وەیەکەو ئەرا وەپشتسەرنان ئی باوەتە کار کردن.
پاپای مەزن هەمیش وت: هووکارە بویمن ک ئاشتی وەبی پێکەوەژیان نییە، ک ئەگەر ئەواکان هویر وە خوەیان کردن، وەبی ئەوە ک هویر وە ئیمە بکەن، هیچ ئاشتی لە خوەرهەڵات ناوڕاس نێەمینێد، و جەخت کرد ک بایەدە وەیەکەو ئەرا دویارووژیگ خاستر کار بکەیمن، و ری لەنوای گەنجەیل واز بکەیمن تا ئەو خەوەیلیانە ک کاریگەر وە ململانەکان بوینە وەجی بارن.
