ژاوەژاویگ لەناو فڕۆکەخانەی بەغداد و سەرۆک وەزیرەیل وەزوی دەسدەێدەوەر
سەرچەوەگە ئەرا ئاژانس شەفەق نیوز وت: ئەو ژاوەژاوە لە ئەنجام زیایبوین شمارەی کاروانەیل ئاسمانی و مەوقەیل نەپووڕیاگ ئەرا گەشتیارەیل بوی، کە سێ کاروان دیر کەفتن، و بویە قەرەباڵغ و ژاوەژاو لەناو فڕۆکەخانەگە، و رەسیە دەسدرویژیکردن وەبان گەشتیارەیل کە داوای ماف خوەیان کردن.
سەرچەوەگە وتیش: محمد شیاع سودانی سەرۆک وەزیرەیل فەرمانیگ زویوەزوی دەرکرد وە دروسکردن دەسەی لێکۆڵینەوە لە مدووەیل دیرکەفتن کاروانەیل و دیاریکردن وەرپرسەیل لەبان ئەو کارە، و دیاری کرد کە بەشیگ لە گەشتیارەیل ناچار بوین لەناو فڕۆکەخانەگە بمینن چوینکە کاروانەیل کەمە، و فڕۆکەیل تەنیا ئەرا گەشتیارەیل بیگانە تەرخان کریانە.
سەرچەوەگە وتیش: سەرۆک دەسەڵات فڕۆکەوانی مەدەنی عراق، بنکین رێکانی، باوەت ئەو قەیرانە گردە دەس، ئەوەیش وە فەرمان محمد شیاع سودانی، کە لێکۆڵینەوەی کوتپر واز کریا تا بزانن می وەرپرسە لەبان ئی ژاوەژاوە.
سەرچەوەگە دیاری کرد کە هوکارەیل ئی قەیرانە چوودەو ئەرا بەدی پلانسازی و هەشمار نەکردن ئەو ساعەتەیلە کە کاروانەیل ئاسمانی خوازن، کە کاروانەیل تیکەڵا کریان (چاتر) وەگەرد کاروانەیل زیارەت چلەی ئیمام حسێن، وەگەرد کاروانەیل ئاسایی، کە کاپتنەیل لە ١٠٠ ساعەت فڕۆکەوانی رەد کردن، ئەوەیش یاسای فڕۆکەوانی شکنێد.
سەرچەوەگە وتیش: هەرلە وەڕیەوبەر کڕەیل ئاسمانی و وەڕیەوبەر گشتی فڕۆکەخانەیل لە وڵاتەگە نەوینە، و هویچ وەرپرسیگ مەیدانی نەویە تا بکەفێدە فتراق قەیرانەگە و چارەسەری بکەێد، مەگەر تەنیا ئەفسەرەیلیگ لە وەزارەت ناوخۆ.
مەردم سۆشیال میدیا پارچەیل ڤیدیۆ بڵاو کردن کە ژاوەژاویگ لەناو فڕۆکەخانەی ناودەوڵەتی بەغداد نشان دەن لەوەر دیرکەفتن کاروانەیل.
