وینەکیشان و نویسانن وەقەی بینای قونسوڵخانەی ئەمریکا لە سیدنی
میدیایل ئوسترالیا وتن: ئی کارەیلە لە نارەزایی پاڵپشتیکردن فەلەستینیەیل تیەێد وەگورەی قسەی رۆیتەرز.
پولیس "نيو ساوت ويڵز" وت: بیناگە لە ناوچەیە باکوور گەورەترین شارەیل ئوسترالیار کەفتە وەر پەلامار و رەنگکاری.
وەگورەی قسەی پولیس، کابرایگ مەتر بووریگ لەوەری بویە، و دەمچەوی پووشیەر و چەکوش بویچکیگ وەدەسیەو بویە، نزیک ساعەت سێەی شەوەکی ئی کار کردگە.
ئەلبانیزی ودلە کۆنگرەیگ رووژنامەوانی لە تەلەڤزیۆن پەخش کریا، هەناێ لەبان رویداوەگە لەلی پرسین وت: تەنیا خوازم بویشم مەردم بایەسە گفتوگۆ و وتار سیاسی بیاشتوون.
وتیش: کارەیلیگ جویر رەنگکردن دیوارەیلی قونسوڵخانەی ئەمریکا چشتیگ ئارا باوەت ئەو کەسەیلە نیەکەێد کە ئی کارە کردنە، کە وە تاوان ویرانکاری دریەێدە قەڵەم.
پولیس وت: ٩ پەنجەرە لە قونسوڵخانەگە زەرەد وەپییان رەسیا، و لە دەر بیناگە کڕ نویسانن کیشیاس.
قسەکەر پولیس وت: کامیرایل چەودیاریکردن کەسیگ نشان دەێد مەتر بووریگ لەوەری بویە و دومچەو پووشاش، و چشتیگ جویر چەکوچ بویچگیگ وەدەسیەو بویە.
وینەیل قونسوڵخانەگە لەبان سایت ئەلیکترۆنی رووزنامەی سیدنی مۆرنینگ هیراڵد بڵاو بویە، سێسویکەی رەنگ سوو و سەرەوخوار لە روی بیناگە نشان دەن.
رووژنامەگە دیاری کرد کە ئەو دروشمە بەشیگ لە چالاکوانەیل لایەنگر فەلەستینیەیل وەکار تیەرن.
رووژنامەگە وتیش: چالاکوانەیل لایەنگر فەلەستینیەیل گرافیتی لەقەی دیوارەیل قونسوڵخانەی ئەمریکا لە میلبۆرن لە مانگ ئایار کیشانە.