کوشیان "سەرکردەی جەهانی" ریخریاگ داعش وە گورزیگ ئاسمانی لە سۆماڵ

 تووڕە هەواڵییەگە لە زار سێ وەرپرس ئەمریکی بڵاو کرد کە سوپای ئەمریکا لە کۆتایی مانگ ئایار گوزەشتە وە گورزیگ ئاسمانی سەرکردەی داعش، عەبدولقادر موئمن کردە ئامانج.

حکومەت ئەمریکا موئمن جویر وەرپرس داعش لە سۆماڵ ناسانوێد، بەڵام دوو وەرپرس ئەمریکی ئەرا تووڕەگە وتن: پارەکە بویەسە "سەرکردەی جەهانی" ئەو ریخریاگ تیرۆریستییە.

وتنیش؛ "وەرگردن موئمن ئەرا سەرکردایەتیکردن جەهانی داعش وە شیوەیگ فراوان نەناسیاوێد"، و شوین ئەبو ئەلحەسەن ئەلهاشمی ئەلقوڕەشی گردگە کە لە کۆتایی ساڵ ٢٠٢٢ لە جەنگیگ لە سوریا کوشیاس.

رووژ 31 ئایار، فەرماندەیی سەربازیی ئەمریکا لە ئەفریقا (ئەفریکۆم) جیوەجیکردن گورزیگ ئاسمانی لەبان داعش لە ناوچەیگ دویرەدەس ڕاگەیان، کە کەفێدە دویری 81 کیلۆمەتر لە باشوور خوەرهەڵات شار بۆساسۆی سۆماڵ، کە لە ئەنجامی سێ چەکدار کوشیان، وەبی ئەوگ  زیانگیگ گیانی لە ناو رزەیل بکەفێد.

 سێ وەرپرس ئەمریکی ئەرا ئێن بی سی نیوز دووپاتکردن کە موئمن ئامانج ئەو ئۆپەراسیۆنە بویە، هەرچەن هویچ دووپاتکردنیگ لە مردنەگەی نەویە.

لە زوان وەرپرسیگ باڵای ئیدارەی ئەمریکا راگەیان کە “ئەمریکا وەرجەیە پەلاماریگ ئاسمانی لەبان ئامانجیگ گەورەی داعش لە سۆماڵ ئەنجامداس”، بەڵام ئەو رازی نەوی ناسنامەی خەەی ئاشکرا بکەێد و وت کە واشنتۆن “هیمان کار ئەرا پشتڕاسکردن ئەنجامەگە کەێد. ”