نه‌ته‌وه‌يل يه‌كگرتگ وه‌ بوونه‌ێ په‌يابوين "شه‌يتان ترۆريستى" وشدارى دا

شه‌فه‌ق نيوز/ چه‌ودێره‌يل سه‌ر وه‌ نه‌ته‌وه‌يل يه‌كگرتگ له‌ راپۆرتيگ وشدارى دان له‌باره‌ێ تيكه‌ڵبوين هه‌ردوگ ريكخرياگ ترۆريستى ئه‌لقاعده‌ و داعش، ك ئى تيكه‌ڵبوينيشه‌ وه‌ په‌يابوين "شه‌يتان ترۆريستى" له‌ شيوه‌ێ ريكخستن تازه‌يگ تاريف كرد.

ئى راپۆرته‌ وه‌ل ئه‌وه‌يشا تواناى تيكه‌ڵبوين له‌بان ئاست سه‌ركردايه‌تى هه‌ردوگ ريكخرياگه‌گه‌ وه‌ دوير زانست و ته‌نيا له‌ئاست لق و فه‌سيڵه‌يل داعش و ئه‌لقاعده‌ تاريفى كردگه‌.

جى باسه‌، زويتريش چه‌ودێره‌يل له‌ نه‌ته‌وه‌يل يه‌كگرتگ ئاماژه‌ وه‌ ئه‌وه‌ كردن ك هيمان  مه‌ترسى ريكخرياگ ئه‌لقاعده‌ گه‌وراتره‌ له‌ مه‌ترسى داعش له‌ چه‌ن ناوچه‌يگ و باس له‌وه‌يش كردن ك لق ئه‌لقاعده‌ له‌ يه‌مه‌ن ناوه‌نديگه‌ ئه‌را په‌يوه‌ندى گشت ئه‌و ريكخرياگ ترۆريستيه‌.