زريان "هێلين" کوشیان و زەرەدەیل گەورەیگ وە ئەمریکا رەسنێد

شەفەق نیوز/ ئمڕوو جمعە، دەسەڵاتدارەیل ئەمریکا گیانلەدەسدان سێ کەس لە ئەنجام رەدبوین زریان “هێلین” ڕاگەیانن، کە کەمەو بویەسەو بەڵام هیمان “فرە رخدارە”.

سەنتەر نیشتمانی زریان راگەیان؛ زریانەگە فلۆریدا بڕیە و وەرەو جۆرجیای هاوسای چگە، و داوا لە دانیشتگەیلی کرد لە "وا ویرانکەرەگە" و هاتن زریانەگە و وارانە رفتەگە بیوەی بوون،  وتیش: "یە رەوشیگ فرە رخدارە"، وەگورەی ئاژانس فرانس پرێس.

 زریانەگە ئمڕوو جمعە، لە ویلایەت جۆرجیا دوو کەس کوشت، دویای ئەوەگ کەسیگ لە ویلایەت فلۆریدا گیانی لەدەسدا.

برایان کەمپ، پارێزگار جۆرجیا لە پلاتفۆرم "X" وت: "دوو کەس لە ناوەند ویلایەتەگە کوشیان"، داوا لە دانیشتگەیل کرد "ئامادەبکەن ئەرا دەرئەنجامە زیاترەیل لەلایەن هێلینەو، وریا بوون، و نزا ئەرا گشت ئەو کەسەیلە بکەن کە زیان وەپییان رەسیە."

میدیایل ناوخۆیی بڵاو کردن کە ئەو دوو قوربانییە وەمدوو گەردەلویلیگ کوشیان کە داد لە ماشینیگ بارهەڵگر.

لەلای خوەییش، ڕۆن دیسانتیس، پارێزگار فلۆریدا ڕاگەیان، کەسیگ لە مەوقەی رانین ماشینەگەی لە شار تامپای کەنار دەریا گیانی لەدەسدا.

وەگورەی خەوەر ناوەند نیشتمانی زریانەیل راگەیان کە ئیوارەی پەنجشەممە زریان هێلین کە لە فرە رخدارە، وە تونی زریانیگ ئاست چوارەم وە پەیمانەی پەنج پلە دادە قەڵەم.

 دویای ئەوە کەمەو بوی و لە ئاست  یەکەم دانریا.

تونی واگە وەگەرد زریانەگە رەسیە 225 کیلۆمەتر لە ساعەتیگ، لەوەختیگ کە وەبان کەنداو مەکسیکەو وەرەو باکوور هوەرئاوای سێیەم ویلایەت ئەمریکا رەد بوی کە فرەترین دانیشتگەیل هاناوی.

سەنتەر نیشتمانی زریانەیل لە سۆشیال میدیا وت: "گشت کەسیک وەدرویژایی کەنارەیل بیگ بێند لە فلۆریدا لە مەترسیە لەوەر هاتن زریانیگ کارەساتبار".

فڕۆکەخانەیل تامپا و تالاهاسی بەسیان و بەشیگ لە سانت پترسبۆرگ کەفتە ژیر ئاو، و ناوڕاس شار تامپا، ساراسۆتا، تریگەر ئایلاند و شارەیلیگ ترەک کە کەفنە کەنارەیل خوەرئاوای فلۆریدا لافاو گردەیان.

وەگورەی ماڵپەڕ پەوەر ئۆدچ کارەبا زیاتر لە ملیۆنیگ ماڵ بڕیا.

دیسانتیس وەرجە هاتن زریانەگە هووشداریی  دادە دانیشتگەیل کە "کەس لە یادەوەریی ئی سەردەمە زریانیگ وەی تونیە نەیە".

 دەسەڵاتدارەیل نیگەرانن لە رخ بەرزەوبوین ئاو دەریایل، کە هاتێ بڕەسێدە شەش مەتر لە کەناراوەیل، کە وەگورەی بەرزی بینایگ دوو قاتیە.

مایک برینان، وەڕێوەبەر سەنتەر نیشتمانی زریانەیل هووشداریدا لەوە کە "ئی سیناریۆ مەحاڵە مەنین لەناوی"، کە وەگەرد شەپوول "ویرانکەر" تیەێد کە توەنێد بەێد لە ماڵەیل  و ماشینەیل بوەێد.

 مەزەنە کریەێد ویلایەتەیل جۆرجیا، تێنسی و کارۆلینای باشوور بکەفنە وەر زریانەگە.