گەرمی لە ئەمریکا دوو کەس سوزنێد... پلەی گەرمی کنار جادەیل رەسیە ٧١ پلەی سەدی
دەسەڵاتدارەیل ئەمریکا ١١٠ ملیۆن کەس لە بەرزەوبوین پلەی گەرمی فرە لە ناوچەیل باشوور خوەرھەڵات وڵاتەگە ئاگادار کردیە، چوینکە ئەو رەوش سەختە کە لە ئەنجامی "گومەزی گەرمی" دروس بوود، هەڕەشەی بەرزکردن پلەی گەرمییگ بیوینە کەێد، وەپەی ئەوەگ لەلایەن رووژنامەی فاینانشیاڵ تایمز بەریتانی بڵاو کریایە.
رووژنامەگە باس ئەوە کەرد کە پلەی گەرما لە شار فۆنیکس پایتەخت ویلایەت ئەریزۆنای ئەمریکا تا ماوەی ١٦ رووژ لەبانیەک رەسیەسە ٤٣ پلەی سەدی و لە کۆتایی هەفتە پلەی گەرما تا ٤٧ پلەی سەدی بەرزەو بویە، لە وەختیگ مەزەنە کریەێد تا چەن رووژیگ ئی گەرمیە بمینێد.
ئی پلەی گەرمی بەرگە نەکریاگە جەرگەی شارەگە کردیەسە جویر بیاوان و خەسەخانەیل و ئاگرکپکردن شارەگە دەس کردنەسە چارەسەرکردن ئەو دانیشتگەیلە وەمدوو سویەری ئاوساو جادەیل.
شمارەی بیمارەیل فرە زیاترە لە ئاسایی، زەخمدارەیل وە شلەی سارد لە خوینبەرەیل چارەسەر کریەن، و خریەنە ناو یەخ.
یەکیگ لە خەسەخانەیل سزیان لە شار فۆنیکس ئەرا رووژنامەی واشنتۆن پۆست وتیە؛ پزیشکەیل چارەسەر ١٠ بیمار کردنە کە سزیانیان ئەوەنە سەختە کە هیشتیە بڕەسنە خەسەخانە.
ئی شەپۆل گەرما لە ئەمریکا دویای ئەوە تیەێد کە دەزگای چەودیاریی کەشوهەوای یەکێتی ئەوروپا راگەیان کە لە مانگ حوزەیران ٢٠٢٣ زەوی بەرزترین پلەی گەرمی تا ئیسە وەخوەی دییە.
