توركه‌يل خوه‌شاڵن وه جۆنسۆن "نه‌وه‌ى عوسمانيه‌يل" بويه سه‌رۆك وه‌زيره‌يل بريتانيا
2019-07-24T20:59:41+00:00
شه‌فه‌ق نيوز/ توركيا ئمڕوو خوه‌شاڵى خوه‌ى نيشاندا وه ريچه‌ڵه‌ك توركى بۆريس جۆنسۆن سه‌رۆك وه‌زيره‌يل تازه‌ى بريتانيا ك له‌تى هوكاره‌يل ره‌سانن و سياسيه‌يل ئاشكراى ئه‌وه كردن "نه‌وه‌ى عوسمانيه‌يل" په‌يوه‌نديه‌يل ناونى هه‌ردوگ وڵات پته‌و ئه‌كا.
له‌ى باوه‌تيشه‌و، ره‌جه‌ب ته‌يب ئه‌ردۆغان سه‌رۆك توركيا، له‌بان ماڵپه‌ڕ تويته‌ر پيرووزبايى له جۆنسۆن كرد و باس له‌وه‌يش كردگه په‌يوه‌نديه‌يل ناونى توركيا و بريتانيا خاسه‌و ئه‌دێ.
جى باسه، يه‌يش له‌وه‌ختيگه ئاژانس ديميرۆرين له زووان يه‌كيگ له خه‌ڵك ئاوايى كلبه‌ت له هه‌رێم جانقرى ئه‌وه ده‌رخستگه ك شه‌ره‌ف گه‌ورايگه كه‌سيگ له خه‌ڵك ئاوايه‌گه‌ى بويه‌سه سه‌رۆك وه‌زيره‌يل و وتگه: وه قژه هويلانه‌‌گه‌يه‌و دياره له نه‌وه‌ى توركه‌يله.
