تاوانیگ دڵتەزن لە تکساس ئەمریکا.. سەر ژنەگەی خوەی بڕیە
2023-01-14T07:56:21+00:00
شەفەق نیوز/ پیاویگ خەڵک ویلایەت تکساس ئەمریکا، وە زوان خوەی ئاشکرا کرد ک ژنەگەی خوەی کوشتیە و لاشەگەی کوتکوت کردیە، ئەوەیش دویای ئەوە ک کامیرایل چەودیاریکردن توومار وسیانی لە شوین کار ئەو ژنە کرد و چەقوو تاوانەگە پەیا کریا.
کامیرایل چەودیاریکردن، نشان کارید دیکوس دان هەنای چوودە ناو ئەو مۆڵە ک ئینجی دیاز ژنی لەناو کار کەێد، ئیجا لەو شوینە دەرچوود و بوتڵیگ مەی نووشێد، تا دویای ئەوە دەرکەفت ک دزیەسەی.
دویای ئەوە، پولیس پەیای تەرم ئەو ژنە کرد و سەری لەلەشی جیاوە کریاگە، ئەوەیش لەناو ماڵ ژن و شویەگە لە ناوچەی ماگنولیا.
وەگورەی رووژنامەی دەیلی مەیل بریتانی، دیکوس وەزوان خوەی وت ئەو ژنیە کوشتیە ک یە تەنیا ٤ مانگە هاوسەریە، و وەچەقوو گەورەیگ کوشتیەسەی.
تروی گیدری وەرپرس پولیس ناوچەی واڵر وت: لاشەی دیاز پارچە پارچە کریاوێد و وەخوین پلگیاوێد.
گیدری دیاری کرد ک دەسەڵاتەیل وەرجەیە فرە ئاگاداری لەلایەن دیاز ئەرایان هاتیە ک کەفێدە تونوتیژی ماڵی.
باوگ و داڵگ دیاز لاشەی پارچەکریاگ دویەتەگیان پەیا کردن، ک وەرجە ئەوە دویەتەگە تەلەفۆنیان کردگە و وەتیە کەسیگ هاتیە پەلاماری دەێد.
