ميره‌يل ناودار سۆران
شه‌فه‌ق نيوز/ ئه‌و ميره‌يل ناودار ناوچى سۆرانه پيكهاتنه له‌يانه:
1- مير سيد كوڕ شاعه‌لى: ئى ميره ده‌س كرده جه‌نگ وه‌ل بابانيه‌يل و تويه‌نست شار هه‌رير له ده‌س ئه‌وان درارێد و موسڵ و كه‌ركووك و هه‌ولێريش له ده‌س قزڵباش سه‌فه‌وى قورتار بكاو بخده‌يانه ژير ده‌سڵات ميرايه‌تى سۆران.
2- عزه‌دين شێر: له سه‌رده‌م ئى ميره سوڵتان عوسمانى سلێمان قانوونى شار به‌غدا له سه‌فه‌ويه‌يل سه‌نده‌و، وه‌لێ له‌وه‌خت گله‌وخواردنى وه سوپاگه‌يه‌و وه‌خاك سۆرانا گله‌وخوارد، ك وه‌فه‌رمان سوڵتان عزه‌دين شێر گيرياو كوشتنه‌ى و حوكمڕانى ناوچه‌گه‌يش وه حسێن به‌گ داسنى ئاغاى ئێزيديه‌يل سپاريا.
3- مير سه‌يفه‌دين: تويه‌نست خاك سۆران له‌ژير ده‌سڵات حسێن به‌ك داسنى درارێد و شكه‌ست وه چه‌ن په‌لاماريگيش ميرنشينيه‌يل كورد بارێد وه‌تايبه‌ت ميرنشينى بادينان، ك وه‌فه‌رمان سوڵتان عوسمانى په‌لامار سوران داوێن، وه‌لێ دوياتر وه‌قسه‌ى يوسف به‌گ برادۆستى گووڵ ئه‌خواو په‌نا ئه‌واده وه‌ره‌و ئه‌سته‌مبوڵ ئه‌را داواى وه‌خشين له سوڵتان عوسمانى، وه‌لێ له‌وه‌خت ره‌سينى ئه‌را ئه‌ورا يه‌كسه‌ر ده‌سوه‌سه‌ر ئه‌كريه‌ێد و ئه‌كوشيه‌ێد.
4- مسته‌فا به‌گ: تويه‌نست روى وه‌ڕوى هه‌وڵه‌يل بابانيه‌يل بدێ، وه‌لێ ئه‌را كووتاييهاوردن ناكووكى ناونيان فاتمه‌خان دويه‌تى دا حسێن به‌گ كوڕ مه‌حمود پاشاى بابان.
5- مير محه‌مه‌د پاشا كووره‌ى راوه‌ندوز 1788- 1838: له‌شوون مردن باوگى "مسته‌فا به‌گ" به‌رنامه دا ئه‌را فراوانكردن و بته‌وكردن ميرنشينى سۆران و تويه‌نست له ماوه‌ى كه‌ميگ زاڵ بدێده بان قه‌وم وخيشه‌يل ناحه‌ز خوه‌ى و شار ره‌واندوز كرده بنگه‌ى حوكمڕانى خوه‌ى و هووزه‌يل جوور برادۆست سورچى و شێروانى خسته ژير ده‌سڵات خوه‌ى و شار هه‌ريريش له بابانيه‌يل داوڕى و هه‌ولێريش خسته بان ميرنشينيه‌گه‌ى و دوياخريش كۆيه‌و رانيه‌يش گرت و زاب بويچگيش بويه مه‌رز ناونى بابان و سۆران.
بيجگه له‌وانه‌يش قه‌ڵاى سه‌خت و به‌رزيش له مه‌رز ميرنشينيه‌گه‌يشى دروسكرد و كارخانه‌ى جه‌نگى و دروسكردن چه‌كه‌يل جوور تانك و بارويتخانه‌يش دامه‌زران.
لوقمان عه‌بدوڵڵا
