فه‌رمانڕه‌وايی بابلول له كوردستان
بابلول له مه‌مڵه‌كه‌ت باوگی ك وه‌ميرات ئه‌رای مه‌نده‌جی، ئاڵای فه‌رمانڕه‌وايی هه‌ڵكرد، خوه‌يشی كه‌سيگ ئازاو چه‌ونه‌ترس و سه‌رڕشته‌دار بوی و ئازايه‌تيه‌گه‌ی ره‌سوێده ئه‌و راده ك ملهوڕی وه‌پيه‌و ديار بوی و حه‌ز له ڕشانن خوين ژيرده‌سه‌يل خوه‌ی بوی.
ئی بابلوله هويچ وه‌ختيگ چه‌وپووشی له هه‌ڵه‌ی بويچگ و گه‌ورا نه‌كرد و هه‌ر له‌وه‌ر ئه‌وه‌يش هه‌ميشه كاروه‌ده‌سه‌يل وڵات دڵسه‌رد و دڵته‌نگ كردياد و كاروه‌ده‌سه‌يل له‌شكر له‌خوه‌ی ره‌نجانێاد.
بابلول له‌وه‌ر كاره‌يل تونڕه‌وی و دڵڕه‌قی خوه‌ی چه‌ن جاريگ مه‌ردم له‌لی هه‌ڵسيان و ده‌سكردنه راپه‌ڕين له دژی، وه‌ل ئه‌وه‌يشا ئی بابلوله وه‌زيريگ داشت ناوی ئيبراهيم به‌گ بوی و پياويگ داناو زيره‌ك بوی، ك هه‌ميشه چاره‌سه‌ر كيشه‌ی ياخيبويه‌يل كردێاد و مقه‌يه‌تی سه‌روه‌خوه‌يی بابلول كردێاد له فه‌رمانڕه‌وايی، وه‌لێ ئه‌وه بوی بابلول دويای ٤٤ ساڵ له حوكمڕانی روی كرده دويا مه‌نزڵ و ماڵئاوايی يه‌كجاری كرد.
مه‌نزه‌ر كوڕ بالول له‌ساڵ ٨٠٨ كووچی ته‌خت فه‌رمانڕه‌وايی گرته ده‌س، ئمجا ئی مه‌نزه‌ره وه بوونه‌ی به‌خشنده‌يی خوه‌يه‌و ژه‌نگ بيزاری و دڵته‌نگی له قه‌ی جامه‌ك ده‌روين دوير و نزيك لاورد، مير و گه‌ورا پياوه‌يل كورد وه ده‌س ودياری فراوانيگه‌و چينه خزمه‌تی و قه‌وڵ وه‌پی دان گووش ئه‌را فه‌رمانه‌يلی بته‌كنن.
ئی مه‌نزه‌ر كوڕ بابلوله هه‌وڵ فريه‌ی فراوانيگ دا ئه‌را خاسه‌وكردن ئه‌و خراوه‌كاری و شكه‌سته‌يل باوگيه ك له‌شوون خوه‌ی وه‌جی مه‌ندوێد، له‌شوون چوار ساڵ فه‌رمانڕه‌وايی، مه‌ئمون به‌گ كوڕی كرده جينشين خوه‌ی و ماڵئاوايی يه‌كجاری له دونيا كرد.
عه‌لی نه‌قی ئه‌لحوسه‌ينی
