سه‌ره‌تاێ سه‌رهه‌ڵداین كومه‌ڵه‌یل و جمشته‌یل ڕوشنهوێرى كوردی له سوریه 6
یوسف مه‌لك سه‌رپه‌ره‌س گوڤار " ئه‌لوجدان " بوێ و گوڤار " ئه‌لحوریه "یش ده‌ركردیاد و هه‌ردو گوڤاره‌گه له لوبنان ده‌رچیان و له ناوچه كورد نشینه‌گان به‌شه‌و ئه‌كریان وه‌تایبه‌ت له شار ئامودا و زورم ڕوشنهوێره‌یل كورد باوه‌ته‌یلیان له‌و دو گوڤاره بڵاو كردیانه‌و و چین ڕوشنهوێریش گوڤاره‌گان خوه‌نستیانه‌و.
هه‌واڵ و بڵاوكراوه‌یل كومه‌ڵه‌گه ڕه‌سیه یه‌كیه‌تی سوڤێت ، پروفیسور ناودار كورد قه‌ناتى كوردو له ساڵ 1956 نامه‌ێگ ئه‌ڕا ئه‌ندامه‌یل كومه‌ڵه‌گه كل و له‌تێ نوێساێوگ :
(براێه‌یل سوپاس خه‌بات و شه‌كه‌تى بوێندان كه‌م .. هه‌رچه‌ن كارێگ سه‌خت و پڕ له كیشه و گرفته ، وه‌لێ باێه‌د ناو كوردستان له گشت گوڤار و ڕوژنامه‌ێگ به‌رزه‌و بكه‌ین چ گه‌ورا و چ بوێچگ ، ئیمه هایمه سه‌ده‌ێ بیسم ، سه‌ده‌ێ پێشكه‌فتن زانستی و ئه‌توم ، هه‌ر ملله‌تێگ داواى ئازادى نه‌كه‌ێگ تاویه‌یگه‌و و نیه‌مینێ ، مناڵ تا نه‌گیرێ داڵگێ شیر وه‌پێ نیه‌ێگ)
براى موخلسدان ، قه‌ناتی كوردو
چاپه‌مه‌نیه‌گان كومه‌ڵه‌گه له بوار ڕوشنبیری :
1-كتاو (قوبرس و دڕنده‌یى توركه‌یل) وه‌قه‌ڵه‌م یوسف مه‌لك وه‌زوان عه‌ره‌بی.
2- جینوساید(كوشتار ده‌سه‌جه‌می) وه‌قه‌ڵه‌م دوكتور كامیران به‌درخان.
3- كل كردن یاداشتێگ 18 لاپه‌ڕه‌یی ئه‌ڕا كونفرانس باندونگ له قاهره له ژێر ناوونیشان (بانگه‌واز ملله‌ت كورد ئه‌ڕا ملله‌ته‌یل ئه‌فریقیا و ئاسیا)
4- جواو داین كوسموبولیتی – حه‌سه‌نین شنێوى – هه‌ڵه‌وگه‌ردانن رَه‌وشه‌ن به‌درخان.
5-خه‌بات كورد – سامد كوردستانی .(جه‌مال نه‌به‌ز).
6-میژوو دێرسیم له كوردستان – نوری دێرسیمی وه‌زوان توركی.
7-(ڕیئول) په‌ێڕه‌و و پروگرام ناوخوه‌یی كومه‌ڵه‌گه.
له بوار كومه‌ڵاتى ، كومه‌ڵه‌گه كومه‌كه‌یل وه‌رزی له ده‌وڵه‌مه‌نه‌یل كورد گرده‌و كردیاد و له ناونی هه‌ژاره‌یل جه‌زیره وه‌شێوه‌ێ ڕێك و پێك به‌شیه‌و كردیاد و كومه‌ڵه‌گه خه‌تمێگ داشت ناو كومه‌ڵه‌گه له‌قه‌یی نوێسیاوێگ و له ناوڕاسه‌گه مێژوو دامه‌زراندنی و سه‌رجه‌م به‌ڵگه‌نامه‌یل كومه‌ڵه‌گه وه‌و خه‌تمه موهر كریاێوگ.
ئه‌ڕاچه كومه‌ڵه دروس كردن و حزب دروس نه‌كردن؟
ئه‌وێش وه‌دو هوكار :
1-په‌یوه‌ندی حزب شوعی سوری وه‌ل ده‌وڵه‌ت بته‌و بوێ ، هه‌ر وه‌ێ خاتره شوعیه‌یل دژاێه‌تى هه‌ر پروژه‌ێگ نه‌ته‌وه‌یی كوردی كردیان.
2-ئه‌و وه‌خته بڕیار یا قانون دروس كردن حزب له سوریه نه‌وێ ، وه‌ێ خاتره په‌نا بردنه ئه‌ڕا ناو كومه‌ڵه ئه‌ڕا وه‌رده‌وامی كار وپێشكه‌ش كردن خزمه‌تگوزاری ، وه‌لێ وه‌داخه‌وه ته‌مه‌ن كومه‌ڵه‌گه فه‌ره دریژ نه‌وێ و له ساڵ 1956 -1958 بوێ هه‌رچه‌ن له‌و دو ساڵه چالاكى چڕوپڕێگ داشت و له سه‌ر داوای سه‌ركرده‌یل پارت دیموكرات كورد له سوریه كومه‌ڵه‌گه خوه‌ێ هه‌ڵوه‌شانه‌و.
ج ك
