ده‌سڵات ناونی "مزه‌فه‌ر" و "ئه‌بواله عالی"
مزه‌فه‌ر كوڕ عه‌لى ك خوارزاى عومران بوى، یه‌كیگ بوى له سه‌ركرده‌یل گه‌وراو سه‌رجه‌م فه‌رمانده و سه‌ركرده و یار و یاوه‌ره‌یلى جه‌مه‌و كرد و، وته‌پیان: له‌یوا دیاره ئه‌بولفه‌ره‌ج محه‌مه‌د ك براگه‌ى خوه‌ى كوشت، ده‌س خوه‌يشی له ئيمه‌يش ئه‌وه‌شنێد و خاستر ئه‌وه‌سه وه‌رجه ئه‌وه‌گ بكه‌فیده كار ئه‌را له‌ناوبردنمان و بكوشیده‌مان، با ئیمه ئه‌و بكوشیم و"ئه‌بواله عالى كوڕ حه‌سه‌ن" له‌شوونى دابنه‌یم و بكه‌یمنه‌ى فه‌رمانڕه‌وا. دى وه‌و جووره گشتیان قسه‌ى په‌سه‌ن كردن و هه‌لیگ ئه‌رایان هه‌ڵكه‌فت و كوشتنه‌ى .
ئه‌بواله عالى كوڕ حه‌سه‌ن كریا فه‌رمانڕه‌واى وڵات زه‌لگاوه‌یل، وه‌لى چوینكه هیمان سفه‌ت فه‌رمانڕه‌وايی وه ته‌مامی وه‌پيه‌و نه‌وی بڕیار دریا خود "مزه‌فه‌ر" بكه‌فید وه‌لیاو كاروبار وڵاته‌گه وه‌لیا بوه‌ێده ریێه‌و، مزه‌فه‌ريش چه‌ن ساڵیگ وه‌ى جووره وڵاته‌گه برده ریێه‌و، ئمجا ده‌سكرده كاره‌يل ژير وه‌ژير و هه‌ر له‌وه‌ر ئه‌وه‌يش وه مه‌هانه‌و و ده‌سپیچگ جوراوجوور شماره‌ی فره‌يگ له فه‌رمانده و سه‌ركرده‌یل دویره‌و خست و كه‌فته فه‌ن و فیڵ وه‌ليانا.
ئه‌بواله وه‌دزیه‌و نامه‌یگ درووكانى نویسا ئه‌را خوه‌ى و كلیكرد وه‌ده‌س كابرایگ بیگانه تا ئه‌ڕای بارێده‌ی له‌وه‌ختیگ ك گشت فه‌رمانده و سه‌ركرده‌یلى جه‌من له‌ده‌ورگردی و ئه‌ويش باێد و نامه‌گه به‌یده ده‌سیه‌وه‌و بویشیده‌پی: ئه‌یه نامه‌ى"سه‌سمام ئه‌لده‌وله‌ى سوڵتان به‌غدا"س.
ئمجا وه‌ختیگ ك كابرا نامه‌گه هاورد، يه‌يش له‌لى وه‌ریگرت و ماچى كرد و خسته‌ى بان سه‌رى و، نامه‌گه واز كرد و له هه‌مان وه‌ختيش وه‌ده‌نگ به‌رز خوه‌نسته‌وه‌ى ئه‌را فه‌رمانده‌و سه‌ركرده‌یلى و ، دویاخريش وت: قه‌وڵ وه‌پى ئه‌يه‌م خزمه‌تكار سوڵتان بووم و مقه‌یه‌تى له‌وڵاته‌گه‌م بكه‌م ، وه‌ى فه‌ن وفیڵه ئه‌بواله عالى كوڕ حه‌سه‌ن كوڕ عومران " مزه‌فه‌ر"له‌بان ته‌خت فه‌رمانڕه‌وایى لاورد و خوه‌ى كرده فه‌رمانڕه‌واو بنه‌ماڵه‌ى شاهێنى له‌فه‌رمانڕه‌وایى كه‌فتن .
مه‌لا جه‌ميل رۆژبه‌يانی
